Srinagar, Jymmang:
Ka jingjur jong u slap ha kine ki khyndiat sngi ba la leit ka la ktah jur ïa kiba bun ki bynta.
Kane ka jingjur jong u slap bad ki jingtwa khyndew ki la buh jingeh ïa kiba bun ki bynta jong ka Poonch bad ka bynta ba shaphang Shatei jong ka Kashmir, ha kaba kane ka la wanrah ïa kiba bun ki jingjulor jong ki jingdon jingem jong ki jaka treikam ba bun bad jong ki riewshimet.
Ïa ka surok Srinagar-Jammu National Highway la khang ha ka lah sngi U Blei namar ka jingjur palat jong ka jingtwa khyndew ha kiba bun ki jaka kiba don ha shi lynter jong kane ka surok.
Ka Kupwara distrik kaba don ha ka bynta ba shaphang shatei jong ka Kashmir kam ïohlad shuh ban leit ban wan sha kiwei pat ki jaka namar ka jingjur jong ka jingshlei um kaba la tap ïa ki rurok.
Ki la don kumba 336 tylli ki longïing kiba la phet bad kynriah jaka shipor kiba shong basah ha ka thaiñ naba ka jingkiew jong ka um kam pat duna na ka daw jong ka jingïai bteng jong ka jingjur slap.
Ki heh ba dei khmih, ki la ong ba ka Pohru Nallah kaba don ha Seelu Kupwara, kaba dei ka shnat jong ka wah Jhelum River, ka la heh um bha ha kaba ka la tam ïa u dak ba buh jingma da 1578.9 m, ha kaba kane ka la pynlong ïa ka um ba kan rung sha ki shnong kiba marjan bad tuid sha ki bynta jong ka surok bah ha Kupwara.
Ki bor sorkar ha Srinagar ki la bthah ïa ki briew jong ka distrik baroh kawei bad kito kiba shong hajan ki jaka ba tuid um ba ki dei ban da husiar bha tad haduh ban da kham rang u slap.
Ka tnat India Meteorological Department (IMD) ka la buh ka jingmaham jur na ka bynta ka jylla Andhra Pradesh, Bihar, West Bengal bad Odisha na ka bynta kine ki ar ne lai sngi ban sa wan halor ka jinghap slap namar kane kan sa long na ka daw jong ka jingjur palat jong ka jingshit.
