New Delhi, Jymmang:
Ki heh pulit ha ryngkat ka kynhun ba la tbit ban pyllip bad pynduhbor ïa ki bom bad ryngkat ka kynhun jong ki ksew sma dien ki la don bynta ha ka jingleit khynra bad ka jingleit khmih bniah ha kiba bun tylli ki skul kiba la ïohpdiang ïa ki khubor shah byrngem pynbthei bom.
Haduh ba la thoh ïa ka khubor ym pat lap dak ei ei wat lada ka la don ka jingleit khynra kaba jur ban sakhi ba la don shisha ka jingthmu pynbthei bom jong ki runar ba la phah ïa ki khubor pyntriem.
Kumba la ïathuh ka tyllong khubor, la ong ba ki la don kumba 100 tylli ki skul ïa kiba la ïohpdiang ïa ki khubor pyntriem lyngba ka E-Mail, kine ki skul kiba la shah byrngem la kynthup ïa ka Sanskriti School jong ka thaiñ ba dei khmih ki pulit jong ka Chanakyapuri, ka Mother Mary School kaba don ha Mayur Vihar jong ka East Delhi, ka DPS School jong ka Dwarka distrik, ka DAV School, ka Amity School, Pushp Vihar bad ka Saket and Sanskriti School jong ka New Delhi distrik napdeng kiba bun kiwei pat.
Ka Delhi Public School, Noida ka la long kawei na ki skul kaba la ïoh ïa ka khubor shah pynbthei bom lyngba ka E-mail.
Ki pulit jong ka Noida ki la long adkar bha hadien ba ki la ïoh jingtip halor kine ki jingïohpdiang ïa kine ki khubor pyntriem.
Ka kynhun pyllip bom bad ka kynhun jong ki ksew sma dien ki la leit khmih bniah ïa kine ki skul bad ïa ki sawdong sawkun jong ki. Kumba la ïathuh ka tyllong khubor la ong ba ki la don kumba 100 tylli ki skul ha Delhi bad ha National Capital Region (NCR) kiba la ïoh ïa ki khubor shah byrngem pynbtei bom hynnin ka step kata ha ka step jong ka sngi Balang.
Shuh shuh la ïathuh ba napdeng kine ki skul, ki la don saw tylli kiba ha Southwest, lai tylli ha East, 10 tylli ha South Delhi nalor kiba bun kiwei pat.
Kine ki skul ki la ïoh ïa kine ki khubor ha ka por 4 baje mynstep.
Ka jingtohkit ha kaba ïadei bad ka jingjia ka dang ïai bteng khnang ban lap nangno ba kine ki Email ki poi, ha kaba la ithuh na ka jingtohkit bniah kaba hashwa ba ka dei kaba la wan bad don ba phah na Russia.
Ha kaba ïadei bad kane ka jingjia, ki kynhun tohkit jong ka sorkar kmie ki dang ïaid shakhamt na ka bynta ban pynlong ïa ka jingtohkit.
Ka tyllong khubor ka la ong ba kum kine ki khubor byrngem la ïohpdiang ruh da ki Airport ha ki lai sngi ba la leit bad da ki Hospital ha ka lah sngi U Blei.
U DCP South-West Delhi u Rohit Meena u la ong ba kane ka jingïohpdiang ïa kine ki khubor pyntriem da kumba 100 tylli ki skul ha ka thaiñ Delhi-NCR bad Delhi ka lah ban dei ka khubor hamsaïa.
“Nga la buh ka jingkyrpad ïa ki kmie ki kpa jong ki khynnah skul ba kim dei ban don ka jingtieng jingsyier, naba kumba la khmih bniah hashwa, la suba ba kine baroh ki dei ki khubor hamsaïa. Ïa kine ki Mail la phah ha ka por 4 baje mynstep jong ka sngi Balang. Ki kynhun batbit jong ngi ki la don bynta ban tohkit bniah halor ka jingjia,” la ong u heh pulit.
