Lucknow, Jymmang:
Katba ki nongkyrshan jong ka seng Congress ki la angnud ba u Rahul Gandhi un long kum u kyrtong ban ïakhun, ka seng Congress ka la dep ban jied da u kyrtong u bym dei na ka longïing ki Gandhi hadien 26 snem jong ka jingtreikam.
Ka Amethi konstitwensi ha Uttar Pradesh ka la long ka konstitwensi ba la bat da ka longïing jong ki Gandhi la slem bha haduh ba kan da jem khnap ha ka seng BJP ha ka jingïakhun ïa ka ilekshon ha u snem 2019.
U Kishori Lal Sharma, uba long u nongkyrshan ba ha kti ha kjat jong ka longïing ki Gandhi, un sa long u kyrtong jong ka seng Congress na Amethi ha kane ka por.
Une u la long u ba-ar napdeng ki kyrtong ka seng Congress ki bym dei na ka jait ki Gandhi ha ki 30 snem na kane ka konstitwensi ban don bynta ha ka jingïakhun na ka konstitwensi ba la bat da kumba saw ngut ki dkhot jong ka longïing ki Gandhi ha ki por bapher bapher.
U kyrtong uba khatduh eh uba la shahjied u bym dei na ka longïing jong ki Gandhi na kane ka konstitwensi u dei u Satish Sharma, uba la jop ha ka jingïakhun ïa ka ilekshon la ar sien hadien ba ka la sah thylli hadien ka jingshah pynïap noh jong u Myntri Rangbahduh barim u Rajiv Gandhi.
Hynrei u la shahrem noh ha ka jingïakhun ïa ka ilekshon ha u snem 1998.
