Bhubaneswar, Jymmang:
Ki la don baroh kumba 223 ngut ki nongtrei jong ka Delhi Commission for Women kiba la shah weng noh na ka kam naduh ka Sngi Palei hadien ba la wan ki hukum na ka Department of Women and Child Development.
Ïa kane ka hukum la phah hadien ba ka la don ka jingmynjur jong u Delhi Lieutenant Governor u VK Saxena ha kaba ïadei bad ka jingkhmih bniah ïa ka kaiphot ba la phah sha u Lieutenant Governor ha u snem 2017.
Katkum ka kaiphot, la ong ba ka Swati Maliwal, kaba long ka Shongknor ha katei ka por jong ka DCW, ka la shah pynshisha ba ka la pdiang ïa kine ki nongthep kam khlem da don ka jingmynjur lang jong ka tnat pla tyngka bad u Lieutenant Governor.
Ka hukum ka la ong ba ki la don tang kumba 40 tylli ki Post ïa kiba la mang hapoh ka DCW Act bad kam shym la don kano kano ka jingpdiang na ka bynta ban thungkam shuh ïa ki nongwad kam palat ïa kaba la buh.
Ka DCW kam don bor na ka bynta ban pdiang ïa kine ki nongwad kam kum ki nongtrei Contractual, la ong ka hukum.
