New Delhi, Jymmang:
Ka kynhun Central Industrial Security Force (CISF) ha ka Sngi U Blei ka la ïohpdiang ïa ka e-mail, kaba la byrngem pynbthei bom ha ki 13 tylli ki kad liengsuiñ kiba don ha kylleng ka ri. kumba la ïathuh ka tyllong khubor la ong ba ïa kane ka khubor pyntriem la ïohpdiang ha ka jaka treikam jong ka CISF ha ka por 3.05 janmiet jong kane ka sngi. Hadien ba la ïoh ïa ka khubor, ka kynhun jong ki pulit khlem da pynslem ka la pynlong ïa ka jingleit jurip bniah bad khynra ha kiba bun ki jaka, ha kaba la pynshisha ba ym shym la lap ei ei kumba la byrngem.
Ïa ka khubor halor ka jingbyrngem pynbthei bom la phah sha Chaudhary Charan Singh International Airport ha Lucknow, Bhopal, sha ki kad liengsuiñ ha Patna, Jammu, bad Jaipur.
Ha kaba ïadei bad kane, hadien ba la pynlong ïa ka jingtohkit kaba bniah, ka kynhun ba la pynlong ïa ka jingleit thwet ka la pynthikna ba ym shym la don ne lap ei ei. “Ka Chaudhary Charan Singh International Airport, Lucknow, bad kiwei pat ki kad liengsuiñ ki la ïoh ïa ka khubor pyntriem lyngba ka e-mail ha ka por 3.05 janmiet.
“Ka kynhun ïada CCSAI Airport ka la pynlong ïa ka jingkhmih bniah ha baroh kawei ka kad liengsuiñ. Hadien ba la dep ban pynlong ïa ka jingkhmih bniah, ka Bomb Threat Assessment Committee ka la rai bad pyntikna ba kine ki khubor pyntriem ki dei ki bym shisha,” la ong ka jingthoh ba la phah da ki heh pulit.
Nalor ka jingleit khynra ka la don ruh ka jingleit khmih bniah, ïa mynta ka Lucknow Airport ka la shim ïa ki sienjam na ka bynta ban wanrah ki lad jingïada bakyrpang na ka bynta ki nongleit jingleit, ka la bynrap. Hynnin ka step, ka Indira Gandhi International Airport (IGI) ha Delhi bad palat 10 tylli ki Hospital ki la ïoh ïa ki khubor shah byrngem pynbthei bom lyngba ka email.
Ki pulit jong ka Delhi hadien kane ki la ong ba kane ka khubor byrngem ka dei kaba thok bad ka jingtohkit ha kaba ïadei bad ka jingjia ka dang ïai bteng khnang ba lap ïa ki runar kiba la phah ïa kine ki khubor lyngba ka email.
