Shimla, Jymmang:
Hadien ka seng Communist Party of India (Marxist), sa kawei pat ka seng kaba ïatreilang hapoh ka kynhun synrop INDIA, ka Aam Aadmi Party, ka la kular ban ai jingkyrshan ïa ki kyrtong jong ka seng Congress ki ban ïakhun ha ka ilekshon Lok Sabha ha Himachal Pradesh.
Kum shi bynta ban pyni ïa ka jingïatylli, u Myntri jong ka tnat pule-puthi ha Himachal Pradesh u Rohit Thakur, u heh nongïalam jong ka seng AAP ha ka jylla u Surjeet Singh Thakur, u MLA barim bad u nongïalam jong ka seng CPI(M) u Rakesh Singha bad u Secretary jong ka seng CPI ha ka jylla u Bhag Singh ki la ai jingkren ha ka jingïalang bad ki nongthoh khubor ha Shimla.
Ha ka jingïakren bad ki nongthoh khubor, u Singha u la ong ba u Myntri Rangbahduh u Narendra Modi u la kwah ban pynïap noh ïa ka synshar paidbah da ka jingpynkut noh ïa ka Riti synshar bad ong ba “ka dei ka sien kaba nyngkong ha ka khana pateng jong ka ri ba ki arngut ki Myntri Rangbah jong ki ar tylli ki jylla (Arvind Krjriwal jong ka Delhi bad u Hemant Soren jong ka Jharkhand) ki la shah phah sha patok.
Kum ka jingong ba u Modi um pat lah ban pynurlong ïa ki jingkular ba u la khlei, u Surjeet Singh u la ong ba mynta “kito kiba la leh ïa ka kam bamsap, ki kam runar bad ki jingthombor ïa ki kynthei mynta ki la shang laitluid hapoh ka jingsynshar jong ka seng BJP katba kiba trei na ka bynta ka jingpynbha ïa ka pule-puthi, ka koit ka khiah bad ka jingthep kam ki la shah phah sha patok”.
U Bhag Singh jong ka seng CPI u la ñiew ïa u Modi kum u “Hitler” bad ong ba kane ka ilekshon ka dei ban ïada ïa ka synshar paidbah bad ka lawei jong ka ri.
Hashwa kane, ha ryngkat ka jingïadonlang u kyrtong jong ka seng Congress u Devendra Jaggi na Dharamsala konstitwensi na ka bynta ka jingpynrung kyrteng ha ka sngi Ba-ar, u Myntri Rangbah u Sukhwinder Singh Sukhu u la ong ba ka sorkar jong u ka la pyntreikam ïa ki jingthmu na ka bynta ban wanrah ki jingmyntoi sha baroh ki kynhun jait bynriew bad ban pyntreikam ïa ki katkum ki bynta.
U la ong ba katba ka sorkar jong u ka la khang ïa ki jingkhang jong ka bamsap, “ha ka jingsynshar jong ka seng BJP ba ha shwa, u Myntri Rangbah ha katei ka por u Jai Ram Thakur u la pynsah thylli ïa ka Treasury bad kam shym lah ban wanrah ïa ka pisa na ka sorkar kmie”.
