New Delhi, Jymmang:
Ki la don kumba saw ngut ki lehnoh jong ka kynhun ISIS kiba la shahkem ha Ahmedabad ha ka lah sngi U Blei, khyndiat sngi hadien ba ka jaka sangeh liengsuiñ ha ka nongbah ka la ïohpdiang ïa ka khubor pyntriem ban shah pynbthei bom.
Ïa kine ki lehnoh ïa kiba la ngeit ba ki dei ki nongshong shnong jong ka Sri Lanka, la kem da ka kynhun Gujarat Anti-Terrorism Squad hadien ba la ïoh jingtip shaphang ka jingdon jong ki bad ka jingpyntikna ba ki dei ki lehnoh.
Kum shi bynta ban batai shai halor ka jingpyntreikam ha kaba ïadei bad ka jingïohkem ïa kine ki lehnoh ISIS, ki pulit ki la ïathuh ba kiba bun ki kynhun pulit ki la don bad thaw da ka kynhun ban leit thwet ïa kine ki lehnoh hadien ba la ïoh jingtip shaphang ka jingdon jong ki ha kane ka jaka bad halor ka jingthmu jong ki ban leit sha Ahmedabad na ka bynta ban leh ïa ki kam thombor ha ka ri.
U Vikash Sahay, uba long u Director General of Police, jong ka Gujarat, u la ong ba kine ki saw ngut ki lehnoh ki la shong da ka liengsuiñ IndiGo kaba dei ban leit sha Ahmedabad na Chennai ha ka Lah Sngi U Blei.
“Ka jingïohkem ïa ki ka la long hadien ba la pynlong ïa ka jingkhmih bniah ïa ka thup kyrteng jong ki nongleit jingleit kiba wan na ka thaiñ ba shaphang Shathie bad ïa kiba la shah ithuh kumba la pyntikna da ki heh sorkar ha Colombo,” u la ong.
Ki pulit ki la ïathuh ba kine ki saw ngut ki briew, ki la ïa ithuh bad uwei u briew ba la tip kyrteng kum u Abu ha Pakistan lyngba ka Social Media.
“U Abu u la ai mynsiem ïa ki ba kin leh ïa ki kam thombor jong ki lehnoh ha India. Kine ki la mynjur ba kin sa leh ïa ka kam thombor kum ki ‘riewkheiñduh ha ka jingpynbthei bom. U Abu uba long u nongshong shnong jong ka Pakistan u la ai ruh ïa ki da T. 4 lak ha ki lut jong ka pisa Sri Lanka,” la ong u Sahay.
