Hyderabad, Jymmang:
Ha ka dur-khih ba ïoh lum, la ïohi ba u nongïalam jong ka seng YSRCP kaba bat ïa ka jingsynshar ha Andhra Pradesh u Pinnelli Ramakrishna Reddy, uba long u MLA ba mynta na Macherla konstitwensi bad uba la jop ha ka jingïakhun ilekshon nangne la lai sien, la ïohi ba u la leit sha ka jaka thep vote ha Palwai Gate, ha kaba la ïohi ruh ba ki heh nongpynïaid ha ka ilekshon ki la ïeng ban khublei ïa u, hadien kane khlem kren ei ei wat tang shi kyntien ruh la ïohi ba u MLA u la leit sha ka jaka ba buh ïa ka Voter-Verifiable Paper Audit Trail (VVPAT) Machine bad shim ïa ka ha kaba u la lympat ha madan ha ka jaka thep vote.
Ka Election Commission ka la ong ba une u MLA u la pynjulor ïa ki Electronic Voting Machines (EVM) ha ki 7 tylli ki jaka thep vote bad u heh pulit jong ka jylla u la shah hukum ba la dei ban pynshitom da kaba tyngeh pyrsha ïa u.
Ki pulit ki la ong ba u MLA u la shah mudui ha kaba ïadei bad kane ka jing-leh jong u bad katba na ka liang ka seng ka liang pyrshah ka Telugu Desam Party ka la pynshisha da kaba ong ba u MLA bad ka seng YSRCP ki la sngewduh jingkyrmen ha kaba la leh ïa kane ka kam naba ki sheptieng ïoh ki shah rem.
Kane ka jingjia ka la jia ha ka 13 tarik, Jymmang, haba baroh 25 tylli ki Lok Sabha konstitwensi ha Andhra Pradesh bad baroh 175 tylli ki Assembly konstitwensi ki la pynlong ïa ka jingthep vote. La ïoh jingtip ba ha kane ka sngi thep vote ki la don ki jingïakynad ha kylleng ki thaiñ.
Ha ka jingphah khubor lyngba ka X, u nongïalam jong ka seng TDP bad u heh nongïalam jong ka seng uba dei u khun jong u Chandrababu Naidu u Nara Lokesh, u la thoh, “U MLA jong ka seng YSRCP u Pinnelli Ramakrishna Reddy u la pynjulor ïa ka EVM ha ka jaka thep vote ha Palwai Gate jong ka Macharla konstitwensi. Nga dawa ba ka Election Commission kan pynshitom da kaba tyngeh pyrshah ïa u Reddy, uba la pynjulor ïa ki EVM bad pynjulor ïa ki naba u sheptieng ba ïoh u shah rem. Ki paidbah kin sa ai jubab ïa ka seng YSRCP ha kaba ïadei bad ki kam jong ka ha ka 4 tarik, Jylliew.”
