Bhopal, Jymmang:
Ka kynhun jong ki heh ka Central Bureau of Investigation kiba la tohkit halor ka kam bamsap kaba la mih na ka Nursing jong ka Madhya Pradesh ka la pynshisha ba ka long shi bynta kiba la donkti ha ka jingjia.
Ki la don kumba saw ngut ki heh ophisar ha kaba uwei napdeng jong ki u dei u Deputy Superintendent, kiba la shahkem halor ka jingbam tyngka jong ki.
Ka kynhun tohkit ka la buh jingmudui pyrshah ïa ki 23 ngut ki briew ha kaba ïadei bad ka jingjia.
Ha u bnai Nailar jong u snem ba la lah, ka la don ka jingithuh ïa 19 tylli ki Nursing Colleges ba la shahweng.
Ka la don ka jingong ba ki la don ki jingpyntreikam harieh ïa kine ki Nursing Colleges hapoh ka jylla.
Ha u bnai uba bud, ka Madhya Pradesh High Court ka la hukum ïa ka jingtohkit jong ka kynhun CBI ha baroh 670 tylli ki Nursing Colleges ïa kiba la pynrung kyrteng ha u snem 2020-21.
Na ka liang ka lad phah khubor ka la tohkit bniah haduh katno tylli ki Nursing Colleges kiba khlem pynbiang ïa ki jingdonkam ban lah ban pyntreikam bad ka jingbym biang ki surok ne ki lynti bad kiwei pat.
Na ka jingwad bniah la lap ba uwei na ki dkhot ba dei khmih halor kine ki jaka pule, la lap ba u la hikai ha kumba 10 tylli ki kolej kiba don ha kylleng ki jaka jong ar tylli ki nongbah bad kum u Principal ha ki katto katne ki kolej bad kum u Associate Professor ha kiwei pat.
Ki ophisar jong ka kynhun CBI kiba la shahkem ki kynthup ïa u Deputy Superintendent u Ashish Prasad bad u Inspector Rahul Raj.
Na ka ejahar kaba nyngkong la pynshisha ba kine baroh arngut ki ophisar ki la donkti ha ka ban ïasuhbuit sniew bad ki dkhot jong ka kynhun kaba ju leit jurip bniah.
Ki la ai ki jingthoh kiba ai jingbit ban pyntreikam wat lada ym biang kum kita ki jaka ai jinghikai sha kiba bun ki Nursing College lyngba ka jingïoh nong na ka jingbam pisa, la ong ka jingmudui ejahar.
U Rahul Raj u la ïadei kam bad kiba bun ki briew ha kaba ki lah ban ai jingtip shaphang ka jingleit jurip bniah jong ka kynhun CBI, ha kaba ki la oh dor bad lum ïa ka pisa ba la dawa bad ban pynbiang ki jingthoh ki ban sakhi ba ki long kiba bit ban pyntreikam.
Ka pisa ba ju oh na man kawei pa kawei ka kolej ka long hapdeng `. 2 lak haduh `. 10 lak bad hadien kane pat kan sa don ka jingïasam para ma ki.
