Lucknow, Jymmang:
Ki pulit jong ka Delhi ha ka Sngi Balang ki la ïathuh ba la kem ïa uwei u briew ba la 33 snem ka rta uba la shah pynshisha ba u la pynsniewdur ïa ki kynroh jong ka Delhi Metro Stations da kaba thoh da ki kyntien byrngem pyrshah ïa u Myntri Rangbah jong ka Delhi u Arvind Kejriwal. Ki pulit ki la pyllait ruh ïa ka durkhih ha kaba ïadei bad ka jingjia ha kaba la ïohi ba une uba la shah kynnoh u la phong da ka sopti rong stel bad thoh ha ka kynroh jong ka Metro Station Platform da ki kyntien byrngem byrsit. Kane ka jingpyntreikam, ka la long hadien ba ka seng Aam Aadmi Party (AAP) ka la buh jingujor bad ka Election Commission of India ha kaba ïadei bad ka jingjia naba ka la mudui pyrshah ïa ka seng Bharatiya Janata Party (BJP) ba ka la thmu ban thombor bad buh jingma pyrshah ïa u Kejriwal”.
Ki pulit ki la ïathuh ba une u briew uba la shah kem u dei u trai shnong na Bareilly. “Ngi la kem ïa u na Bareilly hadien ba la ithuh ïa u da ka jingïarap jong ki CCTV. U la trei ha ka Bank ha Bareilly kum u Loan Manager. Une um shym la don bynta ei ei bad kano kano ka seng saiñ pyrthei ne ba u shah hukum hano-hano ruh ban leh ïa kane,” la ïathuh u heh pulit uba la buddien bad tohkit halor kane ka jingjia. Ki pulit ki la pyllait paidbah ïa ka dur ba la ïoh ring kaba la pyni halor kane ka jingjia ha kaba la ïohi ïa une u briew uba la pruid bad thoh da ki kyntien ha ka kynroh ha Metro Station Platform. Ha ka 19 tarik, Jymmang, u la kiew ha ka Metro na Barakhamba Station bad leit sha kiwei pat ki jaka sangeh rel, la bynrap ki pulit. Na ka jingpynlong ïa ka jingtohkit une uba la shah suba u la phla ba u la donkti halor kane ka jingjia bad u la ong ba u la leh ïa ka namar ka jingbitar.
“U la ong ba u la ïakajia bad ki katto katne ngut ki nongïalam jong ka seng AAP bad u la rai ban thoh ïa kine ki kyntien. Ha ka por ba u la shah tohkit, u la ïai kylla ktien bad pynmih bun ki daw. Ha kaba na ka liang ki pulit ki la ong ba haduh mynta kim pat tip ïa ka daw tynrai halor kane ka jingbyrngem pyrshah jong une uba la shah kynnoh ïa u Kejriwal. U la hiar ha kiba bun ki jaka sangeh rel bad thoh ruh ïa kine ki kyntien byrngem hapoh ka rel ruh, ha ki Signboard bad ki kynroh jong ki jaka sangeh rel,” la ong u heh pulit. U Deputy Commissioner of Police (Metro) u G Ramgopal Naik u la ong ba une u briew u la poi ha Delhi ha ka 13 tarik, Jymmang na ka bynta ban pyndep ïa ki katto katne ki kam.
“Naduh kane ka por, u la sah ha kiba bun ki ïing basa ha Delhi bad NCR. U la ong ba u la shah sumar na ka bynta ka jingshah ktah khlieh jong u,” la ong u DCP Naik. Kumba la lap sakhi, la ong ba une uba la shah kynnoh u la buh ruh ïa ki khubor byrngem ha ka Instagram Account jong u.
Ha kawei na ki jingthoh, u la byrngem ban thap bad ban shoh ïa u Myntri Rangbah katba ha kawei pat u la kynthoh halor ka rukom pyntreikam ha ka tnat Excise ha Delhi hapdeng u snem 2021-22. La ïoh jingtip ba une u briew u la leit phai biang sha Bareilly ha ka Lah Sngi U Blei. Ha kaba ïadei bad ka jingjia, ki pulit ki la ong ba ki la pynngat hapoh ki kyndon 3 jong ka Delhi Prevention of Defacement of Public Property Act bad 72 jong ka Delhi Metro Railway Act pyrshah ïa une u briew.
