Raipur, Jymmang:
Ki la don kumba 7 ngut ki lehnoh Maoist kiba la ïap ha ka jingïasiat markylliang bad ki shipai ïada ri ha khappud jong ar tylli ki distrik kata jong ka Narayanpur bad Bijapur distrik ha Chhattisgarh ha ka por shiteng sngi jong ka Sngi Palei. Ha ka step jong ka Sngi Palei ka kynhun jong ki shipai ïada ka la ïohpdiang ïa ka khubor shaphang ka jingdon jong ki kynhun lehnoh kiba don 16 ngut bad ki dkhot jong ka kynhun ki lehnoh Maoist kaba don ha ka thaiñ Indravati ha ka khappud jong ka jylla.
Haba ki la ïohpdiang ïa kane ka khubor ka kynhun jong ki shipai ïada ka la pynlong ïa ka jingleit thwet bad ka jingleit khynra lehnoh ha kiba bun ki bynta. Ka kynhun jong ki shipai kaba kynthup ïa ki 1,000 ngut ki shipai kynthup jong ka Bastar Fighters bad District Reserve Guards (DRG) ba la lamkhmat da u DSP Rahul Uikey bad u DSP Ashish Netam ha ryngkat ki kynhun jong ka Special Task Force (STF).
Kane ka jingïasiat ka la jia ha ka jaka kaba hap hapoh ka jingkhmih jong ki pulit ka Barsur PoliceSstation kaba don ha Dantewada ka jaka kaba jngai tang kumba 10 kilometers hapoh ki bynta jong ka thaiñ ba don ka khlaw Abujhmad. Ka jingpyntreikam ka la sdang ha ka por 11 baje mynstep bad ha ka por ba ka kynhun jong ki shipai ka la poi ha katei ka jaka, ki lehnoh ki la siat kynsan kynsan pyrshah ïa ki shipai bad nangne ka la mih ka jingïasiat kaba markylliang haduh ka por janmiet.
Haba ka jingïasiat ka la kut, ka kynhun jong ki shipai ka la tur sha ka jaka ba don ki lehnoh ha kaba la lap ïa ki metïap jong ki 7 ngut ki Maoist kiba la riam ha ki jingriam jong ki dkhot ka kynhun People’s Liberation Guerrilla Army (PLGA) ha ryngkat ki tiar siat jong ki”.
