Bengaluru, Jymmang:
U Myntri Rangbah jong ka Karnataka u Siddaramaiah bad u Symbud Myntri Rangbah u DK Shivakumar hadien ka jingleit jngoh ïa kiba bun ki thaiñ kiba don ha Bengaluru kiba la shah ktah na ka jingshlei um ha kine ki khyndiat sngi ba la leit, ki la shim ïa ki sienjam na ka bynta ban leh ïa kaba donkam khamtam ban ai jingïarap kaba kyrkieh sha ki lanot.
Ki la hukum ruh ïa ki heh jong ka Bruhat Bengaluru Mahanagara Palike (BBMP) ba ki dei ban long kiba husiar bha khnang ban lah wanrah ïa ki lad jingïada namar ka nongbah ka la shah ktah na ka jingshlei um bad ka jinglang um ha kylleng ki jaka.
Ha ka jingïakren bad ki nongthoh khubor, u Myntri Rangbah u la ong, “La khmih lynti ïa ka jinghap shuh shuh jong u slap ha une u bnai ban wan (Jylliew) bad ki heh jong ka BBMP ki la shah bthah ba ki la dei ban long kiba la pynkhreh. Kumba la buh hukum da ka sorkar, la ong ba la dei ban pyndap bad pynbha ïa 5,500 tylli ki thliew ha ki surok kiba don ha kylleng ka nongbah bad ban pyntreikam pyrkhing ïa kito ki bym pyllait ïa ka um kaba lang ha kylleng ki jaka.”
U la ong shuh shuh ba u la ïoh jingbit na ka Election Commission na ka bynta ka jingleit jong u sha kane ka nongbah naba ka dang hap ha ka por ba dang treikam ka Code of Conduct.
Ha kaba ïadei bad kane, u DK Shivakumar u la ong ba ki Karikor kin sa don bynta ban khmih bniah la yn lah ne em ban khanglad ïa ka jingrung jong ka um sha ki ïing bad ka jinglang ha ki jaka ba bun.
“Kumba T. 1,800 klur la dep ban mang na ka bynta ban shna ïa ki jaka pynïaid um bad kumjuh ban maramot ïa ki jaka pynïaid um kiba la julor na ka daw jong ka jingjur slap,” u la bynrap.
Ha kaba ïadei bad kane, ka liang pyrshah ka la kynthoh da kaba ong ba ka jing-leit jngoh jong u Myntri Rangbah bad u Symbud Myntri Rangbah ïa ka nongbah ka long tang ka jingthaw buit; u nongïalam jong ka liang pyrshah ha Karnataka u la ong, “U Siddaramaiah bad u DK Shivakumar ki la leit jurip sha kitei ki thaiñ tang ban paw dur ha ki lad phah khubor. Kaei ka jingthmu ban leh ïa kine baroh hadien ba la ïaid lyngba kine kiei kiei baroh haba wan hap u slap? Kim ju patiaw ei ei ha shwa shaphang ka nongbah ha shwa ban wan ka jinghap slap.”
Ha u bnai Nailur jong u snem 2022, ka Bengaluru ka la ïohmad ïa ka jingshlei um kaba jur kaba la ktah ïa ka thaiñ ba shaphang Mihngi jong ka Bengaluru.
Kane ka jingjia ba-shyrkhei ka la paw pyrthei ha kaba kiba bun ki bynta jong ka thaiñ ki la shah tap ha ka um.
