Kolkata, Jylliew:
Ka nongseng jong ka seng TMC bad ka Myntri Rangbah jong ka West Bengal ka Mamata Banerjee ka la pynbna ban ai ka jingkyrshan da kaba ïalap ilekshon na ka bynta ka Priyanka Gandhi Vadra ka ban ïakhun ïa ka ilekshon shiteng samoi jong ka Lok Sabha ha Wayanad, la ïathuh ka tyllong khbor.
Ka Priyanka Gandhi ka la shahjied ban ïakhun ïa ka ilekshon na ka konstitwensi ha Kerala ha kaba u hynmen jong ka u Rahul Gandhi, u la jop hashwa ha une u bnai. U Rahul Gandhi u la jop ha ka jingïakhun ïa ka ilekshon Lok Sabha na Rae Bareli bad Wayanad, ha kaba u la jop bun bha da palat 3 lak vote ha baroh ar tylli ki konstitwensi.
U la pyllait noh ïa ka Wayanad bad u la bat ïa ka konstitwensi ha Uttar Pradesh. Ka seng jong ka Mamata Banerjee bad ka seng Congress kim shym la ïatreilang ha ka jingïakhun ïa ka ilekshon Lok Sabha ha West Bengal na ka daw ba la mih ki jingbym ïasngewthuh jingmut ha ka jingïasam ïa ki konstitwensi.
Kumba ka long mynta kine ki seng ki dang ïatreilang ha ka kynhun synrop hapoh ka ri jong ka INDIA.
