Hyderabad, Nailar:
Ki bor ba dei khmih ki dang bteng ha ka ban pynkynriah jaka ïa ki sniang sha ki jaka ba lait na ka jingktah jong ka African Swine Fever (ASF) khnang ban khanglad ïa ka jingsaphriang jong ka jingpang. Kumba la sakhi, la ong ba ha Mizoram ka la nang jur, ha kaba ka jingïap jong ki sniang na ka jingpang ka la kiew sha ka 8,718 tylli haduh mynta.
Ki jinglong jingman ki la nang shah ktah jur ha kaba ki la don sa kumba 34 tylli ki sniang kiba dang ïap bad sa 59 tylli kiwei pat ki la shah pynkynriah jaka ha kajuh ka sngi. Naduh u Kyllalyngkot jong u snem 2024, ka jylla ka la pynkynriah jaka bad set la kajong ïa 16,158 tylli ki sniang khnang ban lah ban ïaleh pyrshah ïa ka jingpang. Kumba la ïoh jingtip, la ong ba ka Lunglei distrik ki la don sa 24 tylli ki sniang kiba dang shu ïap bad kumba 15 tylli la pynkynriah jaka bad set noh, katba ka Hnahthial distrik ka la don 7 tylli ki sniang kiba la ïap bad 29 tylli la pynïakhlad noh.
Ha Aizawl distirk la don lai tylli ki sniang kiba la ïap bad 9 tylli ki la shah pynkynriah jaka. Ka Animal Husbandry and Veterinary Department ka la pyntikna ba ki 200 tylli ki shnong kiba don ha kylleng jong ka jylla ki la shah ktah ha ka jingpang. Kumba la ïathuh ki heh sorkar, la ong ba ka jingsdang jong ka jingpang ASF ka la long naduh u snem 2021, ha kaba ka la kiew mynta namar ka dei ka aïom shit.
Ka tnat ba dei khmih ka la ïoh ban buh jingthoh ba ki la don kumba 33,417 tylli ki sniang kiba la ïap na ka jingpang ASF ha u snem 2021, ha kaba la bud da 12,795 ha u snem 2022, bad 1,039 tylli ha u snem 2023.
