New Delhi, Nailar:
Ka India ka dang bunkam ban khmih bniah bad peit thuh ha kaba ïadei bad ki jinglong jingman ha ka ri ba marjan ha Bangladesh, katba ka dang pynkhlaiñ na ka bynta ka jingpyntreikam ïa ki shipai, u Myntri korbar ri u S Jaishankar u la ong ba la pynlong ïa ka jingïalang jong baroh ki seng ha Parliament ha ka sngi Ba-ar ban ïamir jingmut halor ki jinglong jingman ha katei ka ri.
Shi sngi hadien ba ka Myntri Rangbahduh jong ka Bangladesh ka Sheikh Hasina ka la iehnohkam bad phet na ka ri hadien ba ki la don da ki spah ngut ki briew kiba la shah pynïap na ka jingïakynad kaba jur kaba la mih na ka jingïakhih ban pyrshah halor ka bhah thung kam, u Jaishankar ha ka sngi Ba-ar u la ïakren halor ka jingthmu ban tehlakam halor kane ba ka India ka lah ban leh bad ïakren halor ki lad ki lynti ki ban lah ban leh ei ei lada don ka jingtuklar na shabar, la ïathuh ka tyllong khubor.
Haba u Rahul Gandhi, u nongïalam ka liang pyrshah ha ka Lok Sabha, u la kylli la ka sorkar ka don ne em ka jingtip shaphang ka bynta jong kino kino ki bor kiba nabar ha ki jingjia ha Bangladesh, u Jaishankar u la ong ba ka sorkar ka tip tang “ki jingtip shaphang ka jingkylla dur jong ki nongmihkhmat jong ka Pakistan kaba pyni ïa ka ka jingkyrshan ïa ka jingïakynad”, la ong ki tyllong khubor.
U Jaishankar u la ong ruh ba ka la don ka jingthmu ban buh da ka sorkar ba shipor ban thaw ha Bangladesh, la ïathuh ka tyllong khubor.
Nalor u Gandhi, u heh nongïalam ka Congress u K C Venugopal, u T R Baalu jong ka Dravida Munnetra Kazhagam, u Lallan Singh jong ka Janata Dal (United), u Ram Gopal Yadav jong ka Samajwadi Party, u Sudip Bandyopadhyay bad Derek O’Brien jong ka Trinamool Congress, ka Misa Bharti jong ka Rashtriya Janata Dal, u Arvind Sawant jong ka Shiv Sena (UBT), u Sasmit Patra jong ka Biju Janata Dal, ka Supriya Sule jong ka Nationalist Congress Party (SP) bad u Ram Mohan Naidu jong ka Telugu Desam Party ki long kiwei pat ki nongïalam ka liang pyrshah kiba la don bynta ha ka jingïalang.
