New Delhi, Nailar:
U Myntri jong ka sorkar kmie uba dei khmih ïa ka tnat ki kam pohïing u Amit Shah u la pynbna ba yn sa wanrah sa ïa san tylli ki distrik kiba thymmai ha Ladakh. Ki distrik kiba dang wanrah thymmai ki kynthup ïa ka Zanskar, ka Drass, ka Sham, ka Nubra, bad ka Changthang. Kumba la khmih lynti la ong ba kine ki distrik kin nang pynbha ïa ka jingshakri paidbah bad ban wanrah ïa ka jingïajan jong ka sorkar bad ki nongshong shnong kiba sah ha ki jaka ba kham sha kyndong.
Katkum ka website jong ka sorkar Ladakh, haduh mynta ar tylli ki distrik ki pynlong ïa ka Union Territory — ka Leh bad ka Kargil.
“Ha ka jingbuddien ïa ka jingthmu jong u Myntri Rangbahduh u Narendra Modi ban kyntiew ha ka kam pynroi ïa ka Ladakh, ka MHA ka la rai ban thaw 5 tylli ki distrik bathymmai ha ka Union Territory. Ki distrik bathymmai, kata ka Zanskar, Drass, Sham, Nubra bad Changthang, kin wanrah ïa ki jingmyntoi ba la thmu na ka bynta ki paidbah sha man ki thliewïng da kaba pynkhlaiñ ïa ka jingsynshar haman la ki bynta,” la ong u Amit Shah ha ka jingthoh ba la phah ha ka rynsan X.
“Ka sorkar jong u Modi ka la don bynta ban wanrah ïa kiba bun ki lad ki lynti na ka bynta ki paidbah jong Ladakh,” la bynrap u Shah. Haba ai khublei ïa ki paidbah halor ka jingthaw ïa ki 5 tylli ki distrik kiba thymmai, u Modi u la ong, “Ka jingthaw ïa ki san tylli ki distrik bathymmai ha Ladakh ka dei ka sienjam sha ka jingsynshar kaba bha bad ka jingroi jingpar. Ka Zanskar, ka Drass, ka Sham, ka Nubra, bad Changthang mynta kin ïoh ïa ka jingpyrkhat kaba kham pynleit jingmut, kaba wanrah ïa ki jingshakri bad ki lad ki lynti kiba khamjan sha ki paidbah.”
Ka Jammu & Kashmir, ka don la ka jong ka Assembly, bad ka Ladakh, kam don ïa ka kynhun ban thaw aiñ. Ka por jong kane ka jingtreikam ka dei kaba la ithuh shai, namar ka bud ïa ka jingpynbna jong ka ilekshon Assembly na ka bynta ka Jammu & Kashmir, kaba la buh ban long ha u bnai Nailur.
Kane kan dei ka jingleh ilekshon kaba nyngkong eh ha kane ka thaiñ naduh ba la sloit bad weng noh ïa ka bhah kaba kyrpang jong ka ha u snem 2019.
