New Delhi, Nailar:
Kum ka jingktah jur ïa ka seng kaba bat ïa ka jingsynshar ka Jharkhand Mukti Morcha (JMM), u heh nongïalam jong ka bad u Myntri Rangbah barim jong ka jylla Champai Soren shen un sa leit ban pynïasoh bad ka seng Bharatiya Janta Party (BJP), la ïathuh ki bor ba dei khmih halor kane ka bynta.
U Champai u la ïakynduh ïa u Myntri ka sorkar kmie uba dei khmih ïa ka tnat ki kam pohïing u Amit Shah ha ka miet jong ka lah sngi U Blei ha New Delhi ha ryngkat u Myntri Rangbah jong ka Assam u Himanta Biswa Sarma, uba long ruh u nongkhmih bad nongpynïaid ïa ki kam jong ka seng ha kaba ïadei bad ka ilekshon Assembly ha Jharkhand ka ban long ha u bnai Naiwieng haduh Nohprah.
U Champai un sa pynïasoh pura bad ka seng BJP ha ka 30 tarik, Nailar, la ong u Sarma ha ka jingïakren bad ki nongthoh khubor.
“U Myntri Rangbah barim jong ka Jharkhand bad u nongïalam bapaw jong ki Adivasi jong ka ri jong ngi. U Champai Soren u la ïakynduh ïa u Myntri ba donburom jong ka tnat ki kam pohïing jong ka sorkar kmie u Amit Shah ha kine ki sngi. Un sa pynïasoh pura bad ka seng BJP ha ka 30 tarik, Nailar ha Ranchi,” la ong u Sarma ha ka jingbuh jingthoh jong u ha ka rynsan X.
Hashwa kane, ha ka por ba u la pynbna halor ka jingïatreilang ha ka kam saiñ pyrthei, u Sarma u la pynpaw ha ki nongthoh khubor ha Ranchi ha ka lah sngi U Blei ba u la kwah ba u Champai un pynïasoh bad ka seng BJP.
“Nga kwah ba u Champai un pynïasoh bad ka seng BJP. Mynta namar ba u don ha Delhi … To ngin sa ïapeit … Ngin pyrshang ban ïakren bad u. La ka long kumno kumno ruh, nga la ïakren bad u ha ki 5 haduh 6 bnai ba la leit hynrei kam pat long pat katkum ka jingïaid lynti ha ki kam saiñ pyrthei. Nga sngew ba mynta ka por ka la wan na ka bynta ban ïakren halor ki kam saiñ pyrthei bad u (Soren),” la ong u Sarma ha ka jingïakren bad ki nongthoh khubor ha ka jaka sah jong u Myntri khynnah jong ka tnat ïada ri u Sanjay Seth ha Ranchi ha ka lah sngi U Blei.
U Champai, ïa mynta u la bat ïa ka shuki kum u Myntri hapoh ka kynhun Myntri jong u Hemant Soren, haduh mynta um pat ai ïa ka shithi iehnohkam ha baroh ar, kata hapoh ka seng JMM bad hapoh ka sorkar jylla.
