Kolkata, Nailar:
Ki jingïakynad bajur ki la mih hapdeng ki pulit bad ki nongïakhih ha GT Road kaba don ha ka thaiñ Howrah Maidan ha ka por ba ki dang pyrshang ban ïaid paidbah sha State Secretariat kum shi bynta bna pynlong ïa ka jingïakhih jong ki ka ‘Nabanna Abhijaan’ ha ka por shiteng sngi jong ka sngi Ba-ar.
Ki pulit ki la bom la tied da ki lathi bad pyndonkam ruh da ka jingkyn -shait um kum shi bynta ban pynsaphret ïa ki nongïa khih kiba la kawang maw bad mawit sha ka kynhun jong ki pulit bad pyrshang ban kiew hajrong jong ki jingker ba la buh ban khang lynti ïa ki ba kin ïaid bad leit sha State Secretariat.
Uwei u pulit ïa uba la pynithuh ïalade ba u dei u nongkhmih hapoh ka jaka treikam jong ki pulit ka Chanditala ha Howrah Police Commissionerate, u la mynsaw ha kane ka jingïakynad.
Kaba kum kane ka jingïakhih ka la jia ruh ha ka thaiñ Hastings bad MG Road, ha kaba ki nongïakhih ki la kawang maw ïa ki pulit, ha kaba kane ka la pynlong ïa ki pulit ba kin leit beh bad ktong ïa kine ki briew.
“Balei ngi shah bom shah tied ha ki pulit? Ngi khlem pynkheiñ ïa kano kano ka aiñ. Ngi la pynlong ïa ka jingïaid paidbah kaba jai jai na ka bynta ban dawa ïa ka hok na ka bynta ka doktor kaba la shah thombor bad shah pynïap. Ka Myntri Rangbah jong ka West Bengal ka Mamata Banerjee ka la dei ban shim ïa ka jingkitkhlieh bad ba kan hiar shuki,” la ong kawei na ki nongïakhih.
Ki nongïakhih ki la pyrshang ban leit sha State Secretariat bad don bynta ha ka jingïakhih na ka bynta ban dawa hiar shuki ïa ka Banerjee halor ka jingshah lehbeijot bad ka jingshah pynïap jong kawei ka doktor jong ka RG Kar Medical College.
