Srinagar, Nailar:
Hadien ka Bharatiya Janata Party (BJP) bad ka National Conference (NC), mynta ka kynti sa ka seng Congress ka la pyllait paidbah ïa ki kyrteng jong ki khyndai ngut ki kyrtong ban ïakhun ha kiba bun ki konstitwensi na ka bynta ka ilekshon Assembly ban wan ka ban sa long ha Jammu & Kashmir.
Kane ka jingpynbna ka la long ha ka sngi Ba-ar hadien ba ka seng ka la dep ban ïabhah ïa ki konstitwensi bad ka seng NC kaba ka la ïatreilang.
U Ghulam Ahmad Mir na Dooru bad u Vikar Rasool Wani na Banihal ki la long napdeng ki nongïalam bapawkhmat ki ban ïakhun ha ka ilekshon.
U Peerzada Mohd Syed, u la thmu ban ïakhun na ka bynta ka Anantnag konstitwensi kaba kongsan, katba u Sheikh Riaz, u dang phai khmat na ka bynta ban ïakhun na Doda konstitwensi. Nalor kane, u Surinder Singh Channi un sa ïakhun na Tral, u Amanullah Mantoo na Devsar, u Shaikh Zafarullah na Inderwal, u Nadeem Sharief na Bhadarwah, bad u Pradeep Kumar Bhagat na Doda West. Ha ka step jong ka lah sngi U Blei, ka National Conference ka la pynmih ïa ka thup jong ki 18 tylli ki kyrteng jong ki kyrtong ki ban ïakhun ha kane ka ilekshon Assembly ka ban wan.
Ha ka jingmymjurlang bad ka jingïasoi halor ka jingïasam ïa ki shuki na ka bynta ka ilekshon Assembly, ka seng National Conference kan ïakhun haduh 51 tylli na ki 90 tylli ki konstitwensi, katba ka Congress kan pynïakhun ïa ki kyrtong ha ki 32 tylli ki konstitwensi.
Kane ka jingïateh ka kynthup ruh ïa ka “jingïakhun paralok” hapdeng ki ar tylli ki seng ha ki san tylli ki konstitwensi.
Nalor kata, mar kawei ka konstitwensi la mang sha ka seng CPI(M) bad ka seng Panthers Party. Ka jingthep vote ha Jammu & Kashmir, kan long ha ki lai bynta ha ka 18 tarik, 25 tarik, Nailur bad ka 1 tarik, Risaw, ba ka jingñiew vote kan long ha ka 4 tarik, Risaw.
