Bengaluru, Nailar:
Ha ka jingïakynduh bad ka Suman Bery, uba long u Vice-Chairman ka NITI Aayog, ha ki khyndiat sngi ba la leit ha Bengaluru, u Myntri Rangbah jong ka Karnataka u Siddaramaiah u la ong ba ka sorkar jylla ka pynlut ïa ka pisa haduh T. 52,000 klur shi snem halor ki san tylli ki skhim ba la buh jingkular ban pyntreikam.
U la ong, “Ha kaba ïadei bad ki 5 tylli ki jingkular ngi la pynlut da palat T. 52,000 klur ha ka shi snem. Kane ka long ka jingkynshew kaba heh tam ban ai jingkyrshan ha ka liang ka ïoh ka kot haba ïanujor bad kiwei pat ki sorkar jylla.”
U Siddaramaiah u la ong, “Ha ka jingïahap bad ka jingthmu jong ngi na ka bynta ka jingpynroi kaba ïaryngkat, ngi la sdang ban wanrah ïa ka mat ïakren kaba kynthup lang ha ka ban ai jingkyrshan ha ki lad kamai beit beit sha ki 12 Million tylli ki longïing lyngba ka jingphah jingmyntoi kaba ïaid beit sha ki nongïoh myntoi. Ngi khot ïa kane ka mat ïakren da ka “Five Guarantees,” kaba long halor ki san tylli ki jingkular.
Ka Gruha Lakshmi kaba dei ka skhim ba ju ai jingkyrshan pisa man u bnai kaba T.2,000 na ka bynta kawei ka longkmie kaba dei ka khlieh jong kawei ka longïing, ka la ai jingmyntoi sha 12 Million ngut ki longkmie lyngba ka jingphah pisa beit beit na ki Bank sha ki nongïoh myntoi.
Ka Gruha Jyothi kaba dei ka skhim ban pynbiang bording hapoh ïing khlem jingsiew haduh 200 unit na ka bynta 14 Million tylli ki longïing, ka Anna Bhagya, ka skhim ba pynbiang 10 kg u khaw na ka bynta uwei u briew ha ka shi bnai, ha ryngkat ka jingphah pisa kaba T.170 lada ym lah ban pynbiang da u khaw.
Kane ka skhim ka ai ïa ki jingmyntoi sha palat 12 Million tylli ki longïing.
Ka Shakti, ka skhim ba pyllait ei ïa ka bai bos haba leit jingleit khlem jingsiew na ka bynta baroh ki kynthei kiba dei ki nongshong shnong, ha kaba palat 280 klur tylli ki jingleit jingwan ba la shim haduh mynta, ka Yuva Nidhi, ka skhim ba u siew man u bnai kaba long `3,000 na ka bynta kiba la dep pule bad `1,500 na ka bynta kiba don ha ka Diploma haduh ar snem lane haduh ban da ïoh kam. Kane ka skhim ka la kyrshan ïa 1.31 lak ngut ki samla.
U Siddaramaiah u la ong, “Ka jylla jong ngi ka la trei shitom halor ka jingthmu ban kyntiew ïa ka roi ka par kaba kynthup lang, ban kyntiew ïa ka jingsynshar, bad ban weng ïa ki jingeh kiba hakhmat eh kiba ka thaiñ jong ngi ka ïakynduh. Watla ka kam jong ngi ka ïadei bad ki jingthmu ba la kdew da ka NITI Aayog bad ka sorkar India, ngi ngeit ba ngi ïaid lynti ïa shibun ki sienjam shakhmat ha ka ban kyntiew ïa ka jingpynrung ïa ki 60 ngut ha ka liang ka ïoh ka kot, ha ka mat kaba ïadei halor ki kam pynroi.”
U Myntri Rangbah ka jylla u Siddaramaiah u la pynpaw ïa ka jingpyrkhat jong ka Karnataka ban pyndonkam ïa ki bor jong ka ban pynkhih ka jingroi ka ïoh ka kot kaba neh. Ka jylla ka la kiew bha ha ki bynta kum ki jingtei, ki kam seng kam-seng jam, bad ka jingpynroi ïa ki bynta ba la buh.
