Bengaluru, Nailur:
U Myntri Rangbah jong ka jylla Karnataka u Siddaramaiah u la kam ba ka 16th Finance Commission ka la pynshai bha ïa ka jubab ban pynbeit ïa ki jingduhnong kiba ka jylla ka la mad, haduh kumba `. 80,000 klur lyngba ki jingai jingïarap ba kyrpang bad ka jingpynkylla ïa ka khajna, ha kine ki san snem ba la dep.
“La dawa ba ka khajna kum ka Cess, ka Surcharge bad ka Non-tax Revenue sha ka sorkar India ba dei ban kynthup ha ka Divisible Pool. Na ka bynta ka bha ka miat jong ka Kalyana Karnataka, la mang `. 25,000 klur na ka bynta 5 snem bad la pynlut da `. 5,000 klur man la u snem. La kyrpad ruh ïa ka sorkar pdeng ban ai ïa ka Matching Grant. Na ka bynta ka roi ka par jong ka Bengaluru, ka la donkam `.55,000 klur bad la kyrpad ïa ka sorkar kmie ba kan ai la kumno kumno shiteng shwa na kane ka pisa,” u la ong ha ka jingïakren bad ki nongthoh khubor.
La wad pisa shuh shuh na ka bynta ban pynïaid ïa ki jingjia ba sngewsih ha ki Western Ghats, bad la ai jingmut ba ym dei ban pynshitom ïa ki jylla kiba treikam bha.
“Ka jylla jong ngi ka noh synñiang 9 percent sha ka GDP jong ka ri, bad ïoh biang 1.5 percent. Ngi la kyrpad ba dei ban pynbeit. Ha ka Finance Commission kaba 14, ka jingmang khajna na ka bynta ka jylla ka long 4.713. Hynrei ha ka 15th Finance Commission, kane ka jingkhein ka la hiar sha ka 3.647, bad la kyrpad ïa ka ban pynbeit ïa kane ka jingpynïaryngkat. La ai jingpynshai ïa ka Commission halor ka jinghiar dor khajna kaba 1.66 percent,” u la ong.
“Ngi shaniah ba ka Commission kan pynbeit ïa ki jingbym ïahap ha ka jingbym ïaryngkat liang, da kaba buh ha ka jingmut ïa baroh ar ka jingïahap bad ka jingtreikam,” u la ai jingmut.
