Itanagar, Nailur 01 (UNI)
U Myntri Khynnah ka Sorkar Pdeng ka tnad Steel & Industries, u Bhupathiraju Srinivasa Varma u la ong ba hapoh ki sienjam ka roi ka par jong u Myntri Rangbahduh ka ri, u Narendra Modi, ka Thaiñ Shatei Lam Mihngi ka la kiew sted bad bynrap ba ka Arunachal Pradesh ka kham long kongsan haba phai sha ka liang ka jingïada naba ka Sorkar India ka long kaba kloi ban kner ïa kiba bun ki jait jingkyrshan na bynta ka ïoh ka kot jong ka.
U Myntri uba don hapdeng ka jingleit jngoh kaba 2 sngi ïa kane ka Jylla, u la ong ïa kane haba ïashim bynta ha ka jingïalang khmih bniah ha Tuting, Upper Siang District ha ka Sngi Thohdieng ban khmih bniah ïa baroh ki skhim ka Sorkar Pdeng bad baroh ki khlieh jong ki ophis treikam bapher-bapher.
Hashuwa, u Myntri u la leit jngoh ïa ki kam kiba dang pyntrei haba ïadei bad ka Civil Terminal, Ladum Suspension Bridge bad ka Tuting Monastery.
Ha kajuh ka por, u la ïaroh ïa ki nongshong shnong ka Upper Siang kiba im hapdeng ka shong suk shong saiñ bad ka jingriewspah na bynta ka roi ka par ha ka liang ki kam jngoh kai pyrthei.
U MLA ka thaiñ bad nongaibuit sha u Myntri Rangbah, u Alo Libang u la batai sha u Myntri halor ki kam pynroi kiba dang ïaid hapoh ka distrik. U la pyntip ruh ba ka Sorkar Arunachal ka kham pynleit jingmut ha ka ban kyntiew ïa ki kam jngoh kai pyrthei bad ‘Horticulture’ khnang ba ki briew kin ym donkam shaniah ha kiwei pat ha ka liang ka ïoh ka kot.
U District Planning Officer, u Talut Tatak u la batai bniah halor ki kam pynroi jong ki tnad treikam bapher-bapher na bynta u 2023-24.
U Myntri hashuwa ban pynkut ïa ka jingwan jngoh ba 2 sngi jong u sha Tuting, Upper Siang District, ha ka Sngi Saitjaiñ u la leit jngoh ïa ka shnong Gelling, ka shnong banyngkong eh jong ka India ha khappud India bad China.
Haba poi ha Gelling, la pdiang sngewbha ïa u da u MLA Libang, Upper Siang Deputy Commissioner Hage Lailang, S.P. Roken Saring Tuting ADC Pandov Perme, ki khlieh jong ki ophis treikam nalor kiwei-kiwei.
Hadien kane, u la ïashim bynta ha ka prokram ban ïakren bad ki paidbah ha Gelling Community Hall ha kaba u la pynsngew ïa ka jingpynleit jingmut ba kyrpang jong u Modi ïa ka roi ka par ha ka Thaiñ Shatei Lam Mihngi.
U Varma u la ong ba ka jingwan jngoh jong u ïa ka distrik ka long katkum ki jingbthah u Myntri Rangbahduh ba la kumno-kumno, uwei u Myntri Sorkar Pdeng un hap ban leit jngoh ïa kawei na ki Jylla ka Thaiñ Shatei Lam Mihngi ha man ka 2 taïew ban khmih halor ka jingpyntreikam ïa ki skhim ba la kyrshan da ka Sorkar Pdeng.
