Chandigarh, Nailur:
U President jong ka seng BJP ha Haryana, u Mohanlal Badoli, u la pynbna ba u Myntri Rangbah jong ka jylla Haryana u Nayab Singh Saini un ïakhun ïa ka ilekshon Assembly ha ka 1 tarik, Risaw na Ladwa konstitwensi jong ka Kurukshetra distrik. Kane ka jingpynbna jong u ka long shisngi hadien ba ka Central Election Committee (CEC) jong ka seng BJP ka la ïakynduh ban ïamir jingmut na ka bynta ban pynbna ïa ka thup kyrteng jong ki kyrtong ki ban ïakhun ilekshon na ka bynta ka Haryana.
Ha ka taïew ba la dep, u Myntri Rangbahduh Narendra Modi bad u President ka BJP ha ka ri u JP Nadda ki la pynïaid ïa ka jingïalang jong ka CEC ban pynkut noh ïa ka jingsam tiket ha ka jingïadon lang u Saini, u Badoli, u Myntri Rangbah barim ka jylla u Manohar Lal Khattar, u Myntri barim ka tnat ki kam pohïing ka jylla u Anil Vij bad kiwei pat ki dkhot jong ka kynhun.
Ha ka jingïakren bad ki nongthoh khubor ha katei ka sngi ha Delhi, u Badoli u la ong, “Ha ka jingïalang jong ka CEC la ïakren na ka bynta baroh 90 tylli ki konstitwensi. Ki la don tang khyndiat ngut na ki kyrtong kiba la shah jied, hadien ar sngi ka la don sa kawei ka jingïalang ban ïakren halor kiwei pat ki kyrteng ban pynbna kum ki kyrtong. Hadien kane yn sa pynbna ïa ka rai ba khatduh.”
Haba kylli shaphang ka konstitwensi jong u Saini, u Badoli u la ong ba un ïakhun na Ladwa. Kumba ka long mynta, u dei u MLA na Karnal. U Badoli uba dei u MLA ba nyngkong eh na Rai jong ka Sonepat, u la ong ba namar ba u dang bat ïa ka kam President jong ka jylla ha katei ka seng, un nym ïakhun ïa ka ilekshon ha kane ka kynti.
Kumba ka long mynta, u Mewa Singh jong ka Congress u dei u MLA na Ladwa, kaba don bun ki nongthep vote na ki jaitbynriew Saini bad Jat bad ka dei shi bynta jong ka Kurukshetra Lok Sabha konstitwensi ha kaba u Saini u la mihkhmat hashwa ba un shahjied ban shimti ïa ka kam hadien u Khattar kum u Myntri Rangbah.
