Srinagar, Nailur:
U heh nongïalam jong ka seng BJP bad u kyrtong na Anantnag West, u Rafiq Wani u la pynshisha da kaba ong ba ka seng kan sa lah ban thaw sorkar ha J&K da ka jingïarap jong ki seng synrop, kiba kynthup ïa ka Apni Party, the Peoples Conference, ka DPAP, the AIP bad ki kyrtong marwei.
U Wani, u la pynshisha shuh shuh da kaba ong ba ha ka sien kaba nyngkong yn sa don u Myntri Rangbah na ka seng BJP ha Jammu & Kashmir naba ka seng da ka basuk kan sa lah ban ïoh ïa ka jingjop ha palat 50 tylli ki konstitwensi ha ka jingïakhun ïa ka ilekshon ka ban wan.
“Ha Jammu ngin sa jop ha ki 35 tylli ki konstitewnsi, ha Kashmir san tylli. U Engineer Rashid, Altaf Bukhari, Sajjad Lone, Ghulam Nabi Azad bad kiba bun ki kyrtong shimet ki la don bynta ban ïatreilang bad ngi bad ngi la don lypa kumba 20 ngut ki kyrtong jong ngi. Lada ki seng synrop bad ki kyrtong shimet kin ïoh 20 tylli ki konstitwensi, ngin sa jop da 35 tylli ki konstitwensi ha Jammu bad ngin sa ïoh palat 50 tylli ki konstitwensi ban thaw sorkar,” la ong u Wani.
Ki nongïalam jong ka seng National Conference bad ka seng Congress ki la kynnoh ba u Altaf Bukhari, Ghulam Nabi Azad bad Sajjad Lone ki long ki briew ba la ïatreilang na rieh jong ka seng BJP ha J&K bad sin ïa ki da ki kynhun A, B bad C jong ka seng.
