New Delhi, Nailur:
U Myntri Rangbah-duh ka ri, u Narendra Modi u la ban biang ïa ka jingkut jingmut ban ïada ïa ki kyndad ha ka jingrakhe ïa ka ‘World Rhino Day’.
U la kyntu ruh ïa ki nongshong shnong ba kin leit jngoh ïa ka Kaziranga National Park ha Assam, ka jaka kaba bun tam ki kyndad shireng (one horned rhino) ha India.
U Myntri Rangbah-duh ha ka jingthoh ha ka rynsan lad pathai ‘X’ u la ong, “Mynta, ha ka ‘World Rhino Day’, to ngin bteng biang ïa ka jingkut jingmut jong ngi ban ïada ïa ki mrad ba pawnam tam ha kane ka pyrthei – ki kyndad. Ka jingïaroh ka leit sha baroh kito kiba don bynta ha ki sienjam ban pynneh-pynsah ïa ki kyndad la bun-bun snem mynta.”
U la ong ruh, “Ka long ka jingsngew-sarong kaba khraw ba ka India ka dei ka jaka kaba bun tam ki kyndad shi-reng. Nga kynmaw ïa ka jingleit jong nga sha Kaziranga ha Assam bad nga kyntu ïa baroh ba kin leit jngoh ïa kane ka jaka.”
