Amaravati, Nailur:
U Chandrababu Naidu uba long u Myntri Rangbah jong ka Andhra Pradesh, u la pynrem jur ïa u President ka YSR Congress, u Jagan Mohan Reddy, halor ka jingkam ba ka sorkar jong u ka la khanglad ïa ka jingleit jngoh jong u sha Tirumala.
“U pynphriang ïa ki khubor lamler”, la ong u Naidu, da kaba bynrap ba ym shym la ai jingpynbna sha u nongmihkhmat ba mynshuwa jong u uba khanglad ïa ka jingleit jong u sha ka Temple. “Hato don mano-mano ba khanglad ïa phi ban leit? Pyni ïa ka jingthoh lada phi don, sha ki lad pathai khubor. Balei phi pynphriang ïa ki khubor lamler,” u la byrngem.
U Mr Reddy u la ong ba baroh ki nongbud bad ki nongïalam jong ka seng jong u ki la pynmih ïa ka jingpynbna ba ym shym la ai jingbit ban leit jngoh ïa ka jaka mane blei. Kane ka jingkren jong u ka long hadien ba ka seng TDP jong u Naidu bad ka BJP kaba ïatreilang bad ka, ki la dawa na u Reddy ban soi ïa ka jingpynbna kaba la thmu na ka bynta ki bym dei ki Hindu shwa ban leit jngoh ïa katei ka jaka mane blei.
Katkum ki kyndon jong ka Tirumala Tirupati Devasthanams, kaba pynïaid ïa kane ka jaka mane blei kaba pawnam, ki bar jylla bad ki bym dei ki Hindu, ki dei ban pynbna ïa ka jingburom jong ki ïa u blei uba synshar ha katei ka jaka mane blei kaba don ha ka jaka lum, u Lord Venkateswara, ha shwa ba kin leit jngoh. Hynrei dang shen ki rukom pynpaw ïa ka jingngeit ki la mih ha Tirumala.
Haba kren ha ka jingïalang bad ki nongthoh khubor, u Myntri Rangbah ka Jylla u la pynjur ïa ka thombor jong u ïa u Reddy, kaba la pynjur ïa ka jingïakynad kaba la mih na ka jingkynnoh jong u ba la pyndonkam ïa ka khleiñ jong ki mrad na ka bynta ban shna ïa ki Laddoos kiba la tyrwa kum ki ‘prasad’ ha katei ka jaka mane blei ha ka por jong ka jingsynshar jong ka sorkar bahashwa ba la lamkhmat da ka seng YSRCP.
“Ki briew ha ka jingim paidbah ki dei ban bud ïa ki riti dustur bad leh ïa kaba donkam ban leh. Kawei pa kawei ka niam ka don katto katne ki riti dustur. Lada phi kwah ban leit jngoh ïa ka jaka mane blei, phi donkam ban burom ïa kita ki riti dustur. Ym don mano mano ruh kiba halor ïa kita ki jingngeit bad ki riti dustur. Ym dei ban don uwei ruh u ban lehbeiñ ïa ki riti dustur jong ki blei bad ki jingngeit jong ki nongmane bad phim lah ban leh ha ka rukom kaba pynjah burom ïa baroh ar,” ong u Naidu.
U Reddy u la ïada ïa ka jingthmu ban leit jngoh khlem soi ïa ka jingthoh, da kaba ong ba baroh ha ka ri ki tip ïa ka niam jong u bad ba u la leit jngoh bunsien ïa ka jaka mane blei ha Tirumala wat shuwa ban long Myntri Rangbah ka jylla.
U la ong ba watla u pule ïa ka Baible hapoh ki saw tylli ki kynroh, hynrei u burom ïa ka niam Islam, Hindu bad Sikh.
Kum shi bynta ban kdew shai halor ka jingïakynad kaba dang shen kaba la mih na ka jingkynnoh jong u ba ïa ki laddoos ba pawnam la shna da ka Ghee ba la saiñ, u Naidu u la ong, “Ïa ki jingsngew jong ki Hindu la pynmong bad ktah jur, bad la ïathuh ba ki nongmane ki pynlong ïa ki jingïakhih. Lada u leit sha Tirumala, kine ki kynhun ki la pynpaw ba kin pynlong ne leh kumjuh. Ki pulit ki don ha ka kamram ban pynneh ïa ka jingsuk bad ka shong suk-shongsaiñ. Balei ba u pynphriang ïa ki khubor kiba bakla halor kane ka mat? Man kawei pa kawei ka niam ka don la kajong ka dustur leh niam bad ki kyndon kiba dawa ïa ka burom.”
U Reddy u la jubab ba u Naidu u la wanrah ïa ka mat laddoo “ban pynphai ïa ki jingbymlah jong ka jingsynshar kaba 100 sngi jong u (u Chandrababu Naidu).
“Ban tap ne kah matlah ïa ki jingbymlah jong u halor ka mat laddoo, u la wanrah ïa ka mat pynbna jingngeit. U la thmu ban bet ïa ki symbai jong ka jingartatien halor ka jinglong jong u Laddu,” u la ong.
