New Delhi, Risaw:
Ka Supreme Court ha kine ki khyndiat sngi ba la leit ka la thalaiñ da kaba tyngeh pyrshah ïa ki sorkar jong ka jylla Haryana bad Punjab halor ka jingbym pynshitom ïa ki nongpynkheiñ aiñ kiba la leh pyrshah da kaba thang bun na ka bynta ban pynmih sboh bad khot hajir ïa ki Chief Secretary jong kine jylla ba kin leit mih hakhmat ka ïingbishar ha ka 23 tarik, Risaw bad phah ïa ki jingbatai bniah jong ki.
Kane ka jingkhot hajir ka long shi bynta ban tohkit bniah na ki halor ki daw kiba la pynlong ba kim lah ban khanglad bad ban pynshitom da kaba tyngeh ïa ki nongpynkheiñ kyndon kiba la leh pyrshah wat haba la khang pyrshah ban thang ïa ki ñiut na ka bynta ban pynlong sboh ha ki lyngkha jong ki.
Ka kynhun nongbishar jong u Justice Abhay S Oka, Justice Ahsanuddin Amanullah bad Justice Augustine George Masih ka la hukum ïa ka Commission for Air Quality Management (CAQM) ba kan pynshitom da kaba tyngeh pyrshah ïa ki heh jong ka sorkar Haryana bad Punjab halor ka jingbym lah jong ki ban pynshitom ïa ki nongpynkheiñ aiñ. Ka ïingbishar ba ha khlieh duh ka la ong ba ka CAQM kam shym la donbor ei ei.
