Mumbai, Naiwieng:
Naba ka jingweng noh ïa ki kyrteng na ka bynta ka jingïakhun ilekshon sha ka ïingdorbar thawaiñ jong ka Maharashtra kan kut mynta ka sngi, ka seng BJP ka ïakynduh ïa ka jingeh kaba thymmai, ym na ki liang pyrshah, hynrei na ki nongïalam jong ka kynhun ba pyrshah seng kiba la thep kyrteng kum ki riewshimet lane kiba kloi ban ïalap ilekshon pyrshah ïa u kyrtong ba la pynïeng da ka seng.
Ka BJP ka la pynhap ym duna ïa ka 8 ngut ki MLA bad mynta ka ïakynduh ïa ka jingleh pyrshah ha kiba bun na kine ki konstitwensi. Ka seng ka ïakynduh ar tylli ki jingeh mynta- ban pynïoh biang ïa ki nongïalam ka kynhun ba pyrshah seng ha ka kynhun jong ka bad ban ïakhun ïa ka jingïakhun kaba la wanrah da ka jingïatreilang ka Congress-Shiv Sena UBT bad ka NCP-SP.
U Symbud Myntri Rangbah ka Maharashtra uba long ruh u heh nongïalam jong ka seng u Devendra Fadnavis u la pynpaw ïa ka jingngeit skhem ba ki kyrtong kiba la leh pyrshah ïa ka seng kin sa shah pynngeit ban trei na ka bynta ka jingmyntoi jong ka seng.
“Ki dei ki briew jong ngi hi bad ka dei ka kamram jong ngi ban ïakren bad ki bad ban pynngeit ïa ki. Bunsien ka don ka jingbym sngewtynnad (halor ka jingsam tiket), hynrei ngi ngeit skhem ban ai mynsiem ïa ki baroh ban trei na ka bynta ka seng,” la ong u Fadnavis.
U Fadnavis u la kdew ba ka BJP ka ïaid katkum ka jingpynbeit jong ka seng bad ki nongtrei, bad ka ïoh ïa ka bor na ki nongtrei jong ka. U Fadnavis u la ong ba ha kine ki 30 haduh 32 snem ba la dep, u ju leit jngoh ïa ka ophis jong ka seng ha Nagpur ryngkat bad kiwei pat ki nongtrei ka BJP ha ka sngi rakhe ïa ka Laxmi Pujan.
Ka ïingdorbar thaw aiñ kaba don 288 ngut ki dkhot kan pynlong ïa ka jingthep vote ha ka 20 tarik, Naiwieng bad ka jingñiew vote kan long ha ka 23 tarik, Naiwieng.
