D H Kharkongor
Ngi lah ïa rung sa sha u Naiwieng, u bnai uba khatwei. Kam slem shuh ba wat une u 2024 ruh un sa leit noh shadien. Ka por ka mareh stet thir-thir. Kam ap la ïano-ïano ruh. Wat la ngi lah ban dang ïoh biang ïa la ka spah ka phew, kaba ngi la kum pynsepei kai, hynrei ym shuh ïa ka por, kaba ngi la kum pynsepei kai. Ngi dei ban pyndep noh mynta ïa kaba ngi dei ban pyndep mynta. Ngim dei ban buhteng tad haduh lashai naba ka lashai kam don.Ngi baroh ngi don beit thik tang ïa ka hynnin bad ïia ka mynta. Ngin hap, namar kata, ban nang bad lah ban siewspah hok ïa ka por.
Te to ngi ïa poi beit noh sha ka phang kaba na ka bynta kane ka taïew bad kata ka dei ka jingkyrpang jong ka ‘Environment Protection Cell’, jong ka Khasi Student Union (KSU), ba kane ka Sorkar jylla kan ‘ban’ ne khang noh shisyndon ïa ka jingthang pynbthei ïa ki ‘patakka’ ne ki ‘firecrackers’ ha ka por ‘Diwali’. Ka angnud namar kata ba ka Sorkar kan khang noh shisyndon ïa ka jingdie bad ka jingpyndonkam ïa ki ‘firecrackers’ naduh kane ka ‘Diwali-2024’, khamtam ha baroh kawei ka East Khasi Hills District.
Ym lah khlem da kubur bad ka ‘Environment Protection Cell’, jong ka KSU, ba ka jingpyndonkam ïa ki ‘firecrackers’, khamtam ha ka ‘Diwali’, ka la nangkiew kat nang mih ki snem. Ka dei ruh ka jingshisha ba ka jingthang pynbthei ïa ki ‘firecrackers’, ha ka por ‘Diwali’, ka nang pynjngut shuh shuh ïa kane ka lyer, kaba la dep jngut lypa, bad kaba ngi hap ban ïa ring mynsiem. Kaba katno tam ïa kiba don ïa ki ‘respiratory ailment’ ne ki jingshitom kiba ïadei bad ka jingring bad ka jingpynhiar mynsiem. Ka dei ruh ka jingshisha ba ka tdem kaba mih na ka jingthang pynbthei ïa ki ‘firecrackers’ ka dei kaba sma ‘bakhor’. Ka jingsma kaba ym sngewtynnad bad kaba ktah ïa ka koit ka khiah ka jong baroh ki jait jingthaw kiba im bad kiba ring bad pynhiar mynsiem. Ka jingsawa ne ka jingbthei, kaba tyngeh, ka da ktah jur bha ym tang ïa u khun bynriew hynrei haduh ïa ki sim ki doh bad ki mrad ki mreng, khamtam ïa kiba la ri ne sumar kyrpang da u khunbynriew. Ka dei ka ‘deafening noise’ ne ka jingsawa jam ne ka jingbthei kaba tyngeh, kaba kiba bun kim lah shah. Ka jingsawa kaba da pynthut shisha ïa ka thiah ka dem khamtam ynda haba la dei ki kynta kiba hadien jong ka shiteng synñia. Ki kynta jong ka jingdonkam ïa ka jingïohthiah ka ban pynjahthait bad ka ban pynkupbor biang ïa ka met ka phad, khlem da klet ruh de ïa ka jabieng.
Hynrei balei ban ñiewtang tang ïa ka ‘Diwali’. Ka ‘Diwali’ ka jong ngi u Khasi lei te kaba neh bun-bun sngi. Kaba ju sdang kumba ar-lai sngi shwa bad kaba kut pat ruh kumba ar-lai sngi hadien jong ka ‘Diwali’ ka jong ki ‘Hindu’. U jong ngi lei te dang step, tang la ka bniat ruh ym pat shut, u lah da mih sha phyllaw ban thang ‘firecracker’. Ka jingpynbthei ïa ki ‘firecrackers’ kiba sawa jam ka la nangïai jia ruh, katba nangmih ki snem, wat ha ka shiteng synñia jong ka miet shwa jong ka ‘Christmas’ ne ka ‘Christmas Eve’, katta ruh da ki ‘Christians’ ne ki Khristan. Kaba kum ka jingïakob ne ka ‘competition’ hapdeng jong ki mano ba kham lah bor ban thang ïa ki ‘firecrackers’ kiba kham kynsai, kiba kham sawa jam bad ruh ban thang kham bun tylli. Kaba katno tam sa ha ka shiteng synñia jong ka miet kaba baroh baroh ngi ïa ap ban ïohpdiang ïa u SnemThymmai ne ïa ka ‘New Year’. Ka jingsawa jam jong ka jingbthei ka jong ki ‘firecrackers’ pat de ruh kaba kum ha por ‘Diwali’. Kumta to ai ba kan long ïa baroh salonsar bad to da shim nuksa ruh de na ka Mizoram kaba ka Sorkar ka la shim ïa ka rai ban khang shisyndon ïa ka jingthang pynbthei ïa baroh ki jait ‘firecrackers’ bad ruh ka jingthang pynher ïa ki ‘sky lanterns’ ne ki Rusni, ha ka ‘Christmas’ bad ha ka ‘New Year’. Ka da mana lypa ruh ba kan leh da kaba tyngeh ïa kino kino kiba pynkheiñ ïa katei ka adong, kata, kynthup naduh ïa kiba pynpoi ïa ki ‘firecrackers’ hapoh ka jylla Mizoram.
Ym lah pat ruh ban shu sngap beit jar halor ki kynrum-kynram kiba hapoh jong ka skul bah North Eastern Hill University (NEHU). Ki kynrum-kynram kiba mih na ka jingbymhun ïa uta u Registrar lem bad uta u Deputy Registrar, kata, nalor ka jingbymhun ïa ka rukom pynïaid ka jong u Vice Chancellor ïa ka skulbah NEHU. Ka don ka jingbymhun ïa ka rukom ba la thungkam ïa uta u Registrar bad ïa uta u Deputy Registrar. La lap la shem, ha kaba ïadei bad ka kyrdan bad ka kam ne ka kamram ka jong ki, ba kim don la ïa ka jingtip kaba bniah (Knowledge) lymne ïa ka jingtbit (Competency). Kim don hi ruh ïa kata ka ‘Right Attitude’.Wat haba la kdewshai ïa kita kiei kiei pynban kim kubur, kata, kynthup ïa U Vice Chancellor, u bym kubur ne pynbeit ïa la ki jingleh ki bym dei rukom ki jong u. Kim shim hi ruh ïa ka jingkitkhlieh ne sngewrem ba ka NEHU ka poi haduh une u pud, na ka daw ka jong ki.
Ha kaba ïadei kyrpang bad uta u Registrar lem bad uta u Deputy Registrar, jong ka NEHU, ba ym banse ban ñiew ïa kiba ki dei ki ‘Kada’. Ki ‘Kada Mutlop’ ki bym sngewthuh ïa la ka jong ka ‘dor’, kaba shisha ka jong ki. Ki ‘Kada Mutlop’ kiba la shu rhah khlemakor ïa kaei-kaei kaba ki dang duna pat de ïa ka jingtip, ïa ka jingtbit bad ïa ka jinglah. Ki ‘Kada Mutlop’ kiba la ïap ka raiñ ka rem namar ka jingrhah bad ka jingsarong biej ïa ka ‘shuki’ ne ka kyrdan kaba ki ïoh ban bat, kaba lem bad ka jingïoh myntoi ne ka tulop. Lah ban ong ba kim ïapher na kata ka ‘Kada kit Blei Thaw. Kiba la shu sarong biej khlem da sngewthuh pat de ba ki dang dei pynban tang ki ‘Tyngab’, kata, hapdeng ki ‘Kbeit’ bad ki ‘Khlieng’ ne kumba ki ju ong ha ka ktien nongwei ki ‘Square peg in a round hole’.
