Raphael Warjri
Ha ka jingtip kaba kyllum ha la ka imlang sahlang la ju pur khana ba ka dkar ka dei ka jynthaw ba jlan tam ka jingim na ki para jynthaw ba ju ïathuh ba ka lah ban im hapoh arspah snem antad. Ki jynthaw kum ki ksew ki miaw ne ki jingri kum ki masi ka blang ki lah ban im tang hapdeng shiphew khatsan snem. Hapdeng ki bynriew pat ha ka juk mynnor ki im palat spah snem, hynrei mynta kiba im paidbah kyllum ka dei hapdeng hynñiewphew haduh phraphew snem. Ka ryta jong ka jingim ki jynthaw ka shong ha ka rukom im bad ka sawdong sawkun jong ka mariang ba shong ba sah. Kawei ka jingshisha kaba lah ban sngewthuh na ka janor briew bad na kaba la mad lyngba ki ryta ka long ba ka mariang ka don ïa ka bor ban kham pynneh ïa ka jingim jong ki bynriew bad kiwei kiwei ki jynthaw. Hynrei hadien ba la wan ka shaipyrthei ryngkat bad kiei kiei jong ka juk mynta na ka bynta ban pynsuk ïa ki bynriew ba ka khate pat ïa ka jingim namar ba la kjeh palat ha ka ïoh suk. Katba dang kham shitom ka met ka phad katta nang plung ka koit ka khiah bad nang jlan ka jingim, hynrei ynda la marmlien ban mad ïa kiei kiei ki ba suk ka wanrah pat ïa ka lanot ban khate ïa ka jingim.
Lada phaidien sha ka jingïathuh khana ba mynnor la ju ïohsngew barabor ba ha ki por mynshwa ki briew ki im kham slem ban ïa ki briew ha ka por mynta. Katba lah ban sngewthuh ka dei na ka bam ka dih, na ki marbam ba mih ha ka mariang ba dang khuid dang suba, na kaba ïajan bad ka mariang ha ki kam ki jam ba man la ka sngi bad ha ka ba sumar la ka met ban ym kjeh ne wad suk than da kaba jaituh jaipdeh lane wat da kaba shu ud khlem nongrim. Ha ki katto katne spah snem te ka la don ka shet ka tiew ïa ka bam naduh ki longshwa manshwa, hynrei lada phai dien shuh shuh sha ka hyndai la ju tip ba ki longshwa manshwa ki dang bam beit da ki jynthung ba mih hi na ka mariang haba ym pat tip ban shet ban tiew. Ha kita ki por ki kham im slem shuh shuh ban ïa ki kmie tymmen kpa tymmen jongngi, bad napdeng ki khana ba shynna bha lah ban kdew na ka Kotbah Khristan kaba buh jingkheiñ ba ki briew ki im haduh jan da ka hajar snem ka ryta. Katkum ka Bible u Methuselah u im haduh 969 snem ka rta bad kiwei kiwei ha ki phew hajar snem mynshwa ki im hi ha ki ryta ba palat 900 snem kynthup ia u Adam, u Noah bad kiwei kiwei. Lehse suki suki ha ka jingkylla ka mariang bad kiei kiei baroh ha ka imlang sahlang ba la nang lyngkot ka ryta ba im ki briew, bad ha kane ka juk mynta ki briew ki im tang hapoh ka shispah snem, bad lada shim kyllum kham ñiar ba kin khajoh sha ka phraphew snem.
La jynjar ban kylla ïa kiei kiei ha ka pyrthei na ka bynta ban koit ban khiah krat bad ban im slem ki bynriew namar ba ki jingkylla ha ka pyrthei mariang ki long kiba la jubor ba ym lah shuh ban pynneh pynsah ne sumar sukher. Katba nang shai ka pyrthei katta nang mih ki jyntei ba laiphewjait ha baroh ki liang kiba pynjulor ïa ka jinglong nylla jong ka mariang. Kumta lada ki bynriew ki thrang katno katno ban sumar sukher bad ban phikir na kino kino kiba sniew ne ba long bih ha ka mariang ka long kaba jynjar ban kyndiah, namar ka lyer, ka sngi, u slap u phria, ka um ka wah, ki jynthung jyntep ki soh ki pai kino kino ki jynthaw jong ka mariang ki la byrsieh haduh katta katta ba ym don mano mano na ki bynriew ki ban dang lah ban kiar ne kyndiah na ka jingsniew ha baroh ki liang. Kumta ha kaba wai kan ktah beit ïa ka jingjlan jong ka ryta ha ka longbynriew manbynriew. Ym don iwei ruh na ki briew ba lah ban kiar na ka lyer bih, ka um bih bad ka jyrsieh laiphewjait la ha ryng-kew ne ha ñiamra, ha sahit ne ha kliar lum ki ba ym lait shuh na ka jyrsieh jong ka ba la lynsher da kaba tei ïa ki jingtei laiphewjait lyngba ka jingstad jong ka juk mynta. Kine kiei kiei ki ktah ym tang ïa ki briew, hynrei ïa ki mrad ki mreng, ki sim ki doh, ki khñiang ki ksiah bad wat ïa ki jynthung jyntep ruh.
Lada puson sani kaei kaba ka jinglah jong ki briew ban tip ïa ka pyrthei mariang ka long tang shisaphit haba nujor ïa ka jingiar bakhraw jong ka meiramew, ka meimariang bad baroh ki snap tynrai jong ka mariang ha kylleng naduh na suiñ na sahit haduh ha ryngkew ha ñiamra bad sha ki liewlong jong ka duriaw bad sha ka sahit kynjoh lisan. Haba kdew ïa ki briew shimet lah ban kam ba wat kito ki riewtbit bakhraw shaphang ka mariang ruh kim pat lah ban kner ne tba la ka jingtip naphang lin, wat haba ka jingtip jongki ka lah ban long palat spah ne hajar shah ïa ki paidbah paidsan. Kumba ka duriaw bah jong ka pyrthei ka ïar palat liam ban nujor bad ka jingjylliew jong ka tyllong um na ki dymmiew, ba ki briew ki ïoh ban tba tang na sla, lada dei ïa ka umdih na shyngyiar ne ka um ba sum ba sait na wah ne na pung. Ki briew kiba stad tam ha pyrthei ha la ki jingtbit kyrpang kin long tang shitroh ha ba nujor na ki paidbyllien kiba saphriang ha kylleng ka pyrthei.