Halor ka Ropeway Project ha Lum Shyllong

I. R. Dkhar Ka jingïakhih ban pyrshah ïa ka jingshna ïa ka Ropeway Project ha Lum Shyllong da ka Joint Action Committee (JAC) ka la poi sha ka 13 sngi haduh ba thoh ïa kane...

I. R. Dkhar

Ka jingïakhih ban pyrshah ïa ka jingshna ïa ka Ropeway Project ha Lum Shyllong da ka Joint Action Committee (JAC) ka la poi sha ka 13 sngi haduh ba thoh ïa kane ka artikyl.  Ka jingïakhih ka la sdang (officially) naduh ka 17.10.2026, kumba ngi lap na ki jing-thoh. La ong ruh ba kane ka jingïakhih ka la sdang hadien ba la iohi ia ki jingkhreh bad ki jingpom ïa ki dieng ki siej bad ka jingpyntrei kaba la pynkyndit ïa ka shong ka thaw, kumba ju long ka rukom da kaba pyntip paidbah ne kata ka Public Hearing, ban tip ïa ka jingthmu bad ka jingpynshai paidbah. Ka jingïakhih jong ka JAC ka la ioh ïa ka jingïasnoh bad jingkyrshan da uba bun balang bad ki Seng Bhalang ha sor Shillong hi baroh kawei. Khlem da ong ïa ki daw babiang jong ka JAC, kane ka Ropeway project ha u Lum Shyllong, peit ngi u paidbah bad ka Jylla hi baroh kawei, ngi la jied ïa ki Nongmihkhmat / Nongïalam ïa ki shnong ki thaw bad ha ka Jylla kiba dei kita ki riewshemphang, kiba iohi jngai ïa ka ri bad ka jaitbynriew. Ngi khmih lynti na ki, kumba ngi la jied bad ki la thaw ïa ka Sorkar, ba ma ki, ki la dei ban wanrah ïa ka jingroi jingsan ka bym ktah ïa ka iap ka im bad ka lawei jong ka jaitbynriew. Ha ka jingshisha, kam dei shuh ban don ka jingïakhih. La ïalam bha ma ki, ka ri bad ka jaitbynriew ka la bha, lada sniew ma ki ne ki ïalam bakla ma ki, ka ri bad ka jaitbynriew ka sniew bad poi sha ka jingma. Hynrei la ïakhih pynban da u paidbah. Toi, la dei ban pan jingmut na u paidbah, lada donkam.

Haba ngi pyrkhat ïa kane ka jingleh jong ka Sorkar, wat lada ngim tip ïa ki jingthoh jingtar ne ki jingdonkam, kata, kaba la ïateh bad kita ki Company, kumjuh ruh kaba la ioh ïa ka jingbei pisa kaba haduh Rs. 151 klur tyngka na ka bynta katei ka project, ngi sngew pat ban pashat jingmut lem ba ka Sorkar ka la dei ban pyrkhat thymmai ïa kane ka project ban pyndam noh ïa kane Ropeway project ha u Lum Shyllong. Namarkata, ngi sngew ban ai jingmut ba ha ka jaka jong kane ka Project, la dei ban shna ïa ki surok, ki jingkieng ha bun ki jaka bad bynta bapher bapher ha ka Jylla baroh kawei.

Kum uwei u riewpaidbah, uba kwah ban ai jingmut halor kane ka bynta, peit ym don flyover. Phin da iakynmaw, ka la don ka jingthmu ban shna ïa ka flyover na Rap’s Mansion, najan Secretariat, sha Them Ïew Mawlong ha u snem 2004-2005 ban pynsuk ïa ka jingkhapngiah kali ha sor Shillong. Wat lada kane ka jingthmu kam shym la long kam, hynrei dei ban pyrkhat shawei pat. Kaba ar,, ka long ka surok na Mawmaram-Shiliangum-Mawlaingut sha Mawlyndep ter ter shaduh Umiam ka ban ïakynduh ha Umsaw bad pynïasoh ha ka Shillong-Guwahati road. Kaba lai, ka la don ka jingdawa ban thaw ïa ka surok na Umlyngka (3 mer)-Umsyiem sha Shiliang um. Kaba saw, ka dei ban shna pynbha bad pynheh ïa surok na Mawphlang sha Mawkyrwat ter ter.  Kane ka surok ka long kaba rit bad basniew.

Lada ïakynduh artylli ki kali, kaba leit bad ka wan na Shillong bad sha Shillong ka long kaba eh bha ban ïa pass. Dang shen, ngi la leit sha Mawkyrwat bad ngi shem ba kane ka surok ka sniew bha, sah kumjuh khlem pynbha, khlem pynheh, kumba ka la don ka jingmut jong ka Sorkar.  Ka jingpyrkhat ka long balei ym wad ki lad ki lynti ban shna ïa ki surok, pynbha bad pynheh ha ka dur jong ka 4-lane khnang ka leit ka wan ki kali kan pynsuk. Shuh shuh, ngi tip ba bun ki nongkyndong kim don surok bad kiba don ruh la shu ieh jot rathai khlem pynbha. Ki nongkyndong ki dei ki briew jong ngi kiba duk batoi, ki donkam shisha ïa ki surok ban suk ha ka leit ka wan, ka kit ka bah khamtam ha ka pang ka shitom. Namarkata, la dei ba ki bor Sorkar ban pyrkhat ha ka jaka ban pynlut da ki klur tyngka ïa katei ka Ropeway Project ha Lum Shyllong, thaw ïa ki surok kiba long kiba pun jingjieng ïa ka roi ka par jong ka Jylla bad ki paidbah la ha sor ne nongkyndong nangne shakhmat. Hangta u paidbah un pyrto ïa ka jingleh jong ka Sorkar mynta bad lashai.