New Delhi, Naiwieng:
U Myntri ka tnat ki kam Pohïing jong ka sorkar kmie u Amit Shah u la ong ba ka sorkar jong u Modi ka angnud ban tei ïa ka ri India kaba lait na ki kam lehnoh da ka rukom pyntreikam jong ka kaba long pyrkhing.
U Shah u la ong ba ka jingïakren kaba ar sngi halor ki jingwad ïa ki lad ki lynti ban ïakhun pyrshah ïa ki lehnoh, ka la sdang ha New Delhi ha ka Sngi Palei, ha kaba kan sa nang bteng ha ryngkat ka jingïashim bynta lang jong kiwei pat ki kynhun khnang ban lah ban pynkhlaiñ ïa ki lad jingïada jong ki shipai ka ri.
“Ka sorkar u Modi ka thmu ban tei ïa ka ri India kaba lait na ki kam lehnoh da ka rukom pyntreikam jong ka kaba long pyrkhing,” u la thoh ha ka rynsan ‘X’.
Hapoh ka jingïalam jong u Myntri Rangbahduh ka ri, ka sorkar ka thmu ban rat dyngkhong ïa ka jingsniew jong ki kam pyntriem jong ki lehnoh da kaba bud ïa ka rukom pyntreikam pyrshah ïa ka, la ong ka jingthoh ba la wan na ki heh sorkar.
Ka jingïalang ba la ju pynlong man la u snem ka la long ha kine ki snem kum ka jaka ïakynduh na ka bynta ki jingpyntreikam jong ki kynhun ïaleh, jong ki riew shemphang bad ki kynhun kiba don bynta ban ïakhun pyrshah ïa ki kam pyntriem jong ki lehnoh halor ka mat ba donkam ban ïakren halor ka jingpynbiang ïa ki lad jingïada bad ka jingshngaiñ jong ka ri ban lait na ki kam pyntriem jong ki lehnoh.
Ka jingthmu ba kongsan jong kane ka jingïalang ka long ban pynroi ïa ka jingïatreilang hapdeng ki nongshim bynta bapher bapher da kaba thaw ïa ki lad ki lynti na ka bynta ban ïatreilang pyrshah ïa ka jingma jong ki kam lehnoh ha ka mynsiem jong ka ‘jinglong jong ka sorkar baroh kawei’ bad ban wanrah ïa ki jingai jingmut kiba kongsan na ka bynta ban thaw ïa ki lad pyntreikam ha ka lawei, la ong ka kyrwoh khubor.
Ki jingpyrkhat bad ki jingïakren ha kane ka jingïalang kin long halor ki mat bapher bapher kiba kongsan, kynthup ïa ka jingpynngat mukotduma bad ka jingpynkylla ïa ka aiñ ha ki jingtohkit pyrshah ïa ki kam pyntriem jong ki lehnoh, ka jingïasam bad ïamir jingmut halor ki bynta bynta katkum ki jingshem bad ki rukom treikam kiba bha.
Ki jingeh bad ki lad ki lynti kiba ïadei bad ki kor ki bor kiba dang mih, ka jingïatreilang ha ka liang ka aiñ ha ka pyrthei bad ki buit ban pynduh pyndam ïa ki buit treikam jong ki lehnoh ha ki jaka ïaleh pyrshah bapher bapher kiba don ha kylleng ka ri India la ïakren ruh ha kane ka jingïalang.
Ha kane ka jingïalang la ïashim bynta da ki heh pulit na ki Jylla bad ki UT, ki ophisar na ki tnad bapher bapher kiba peit ïa ki mat ba ïadei bad ka jingïakhun pyrshah ïa ki kam lehnoh bad ki riew shemphang na ki tnat ba ïadei kum ka aiñ, ka jingwad bniah bad ki buit treikam katkum ka juk mynta, la bynrap ka tyllong khubor.
