Thiruvananthapuram:
Ka General Secretary jong ka seng Congress ka Priyanka Gandhi Vadra, kaba la mih paidbah kum ka kyrtong jong ka kynhun UDF ban ïakhun ïa ka ilekshon shiteng samoi jong ka Lok Sabha ha Wayanad, ha ka sngi Palei ka la ong ba ka jingsngew jong ka shaphang ka jingshakri ïa ki paidbah jong kane ka konstitwensi kan long kumjuh kumba long ki jingsumar jong ka kmie ïa la ki khun.
Ka Priyanka, ha ka sngi kaba khatduh jong kajingleit ïalap ilekshon ha ka sien ïuhkjat kaba ar, ka la ong ba lada ka ïohlad, kan sa ïakhun na ka bynta ki briew jong ka Wayanad ym tang ha Parliament, hynrei haman ki liang.
Kum shi bynta ban nang bteng ha kaba ïadei bad ka jingkynthoh jong ka ïa ka seng BJP, ka kyrtong jong ka kynhun UDF ka la kynthoh jur ïa ka seng BJP bad ka la ong ha ka Lah Sngi U Blei ba ka seng BJP ka la pynlong kam saiñ pyrthei ïa kiba bun ki mynsiem briew bad pynphet shnong ïa kiba bun ki nongshong shnong. Kum ka jingsdang ïa ka sngi kaba ar jong ka jingïalap ilekshon, ka la ai jingkren ha ka jingïalang paidbah kaba long ha Kenichira ha Sulthan Bathery Assembly konstitwensi.
“Wat ïa ka jingjia basngewsih kaba la ktah jur haduh katta katta ïa ki briew la shah pynlong kam saiñ pyrthei ha ka BJP. Bad kane ka dei kaba ngi sdang mynta ka sngi. Ngi ïeng ha ka jaka ba phi dei ban pyrkhat ïa la ka ri, ïa la ki jong ki jingdonkam, bad ïa ka jait kam saiñ pyrthei kaba phi kwah ha ka ri jong ngi,” la kynthoh ka General Secretary jong ka seng Congress.
Kum ka jingthalaiñ tyngeh ïa ka seng BJP, ka Priyanka ka la ong ba ka saiñ pyrthei jong ka BJP, “kaba la saphriang kylleng ka ri, ka paw da ka jingshun, ka jingbitar, ka jingïapher, bad ka jingpynjot.”
Ka la pynpaw ba ki mat ba shisha kiba ki paidbah ki ïakynduh ki shah iehnoh beiñ, bad ki jingeh jong ki ki dang sahkut khlem lah ban pynbeit ne weng. Ka la kynnoh shuh shuh ba ka jingkyrduh kam kyrduh jam ka la jur bha ha ki por baroh bad ki dor jong ki mar ki mata ki la nang kiew na ka por sha ka por, khlem da don dak ei ei ba kan hiar.
“Ka saiñ pyrthei kam dei kaba pynleit jingmut ha ka ban weng ïa kine ki jingeh. Ka saiñ pyrthei jong ka BJP ka dei tang ban pynthut ïa phi na ki jingeh jong phi, namar tang kawei ka jingthmu jong ka ka long ban neh ha ka bor synshar, wat la ka long kaba rem dor”, la ong ka Priyanka. Ka la kynnoh ruh ïa ka sorkar kmie ba la ïalam da ka BJP ba ka ‘kam shym lah’ ban sam ïa ka pisa kaba donkam ban ïarap ïa ki longïing kiba shah ktah na ka jingtwa khyndew kaba jur.
“Lada phi ai lad ïa nga ban mihkhmat ïa phi ha Parliament, ngan pyni ïa phi ba nga lah ban trei shitom kham bun shah ban ïa kiwei pat na ka bynta jong phi. Ngan pynpaw ïa ki mat jong phi ha man la ki jaka. Ngan ïaleh na ka bynta jong phi bad ngan pynbor ïa baroh ar ki sorkar kata ka sorkar jylla bad sorkar kmie ban pyntreikam. Phi don ïa u nongïalehkai ba khlaiñ ha ka liang jong phi u bym ju kynran dien haba ki jingdonkam jong phi ki don ha ka jingma,” la bynrap ka Priyanka.
Ka nongïalam jong ka seng Congress, ka la sdang biang ïa ka bynta kaba ar jong ka jingïalap ilekshon jong ka, ha ka sngi U Blei, da kaba pynlong ïa ki jingïalang paidbah bad ki jingïalang ha ki kyndong kynshrot jong kane ka konstitwensi ha ryngkat u hynmen jong ka u Rahul Gandhi.
Ka Priyanka Gandhi, kum ka jingmih khmat nyngkong eh ha ka ilekshon, kan don ha Kerala, haduh ka 7tarik Naiwiengr, katkum ka jing-leit ïalap ilekshon jong ka. Ka thmu ban pynlong ïa ki jingïalang ha ki saw tylli ki jaka kiba hap hapoh ka Kalpetta bad Sulthan Bathery, ha ka lah sngi U Blei.
Kane ka ilekshon shiteng samoi na ka bynta ka Wayanad Lok Sabha konstitwensi ka la long kaba donkam hadien ba u Rahul Gandhi uba la jop ïa ka Lok Sabha ilekshon na baroh arliang kata na Wayanad bad Raebareli, u la rai ban pyllait noh ïa ka Wayanad konstitwensi.Ka jingthep vote ha Wayanad kan long ha ka 13 tarik Naiwieng.
