Mumbai, Naiwieng:
Ki nongïalam ha ki distrik bad ki seng bapher bapher ha Pune, ki la nang pynjur ïa ki jingpyntreikam na ka bynta ka jingthmu ban nang pynkhlaiñ ïa ki kam jong ki seng jong ki ha baroh ki liang khamtam ha kaba ïadei bad ka ilekshon.
Kumba ka long mynta, la ong ba ki la don kumba 303 ngut ki kyrtong ki ban ïakhun ha kylleng jong 21 tylli ki konstitewnsi hadien ba 179 ngut ki kyrtong ki la weng noh ïa ka kyrteng jong ki ha ka sngi ba khatduh jong ka jingpyntreikam, la ong u heh sorkar. Ha kaba sdang, ki kyrtong kiba la thep kyrteng ki la don 482 ngut. Ka jingweng kyrteng jong kiwei pat ka la pynsah sa 303 ngut ki kyrtong ki ban ïakhun ha ka ilekshon, la pyntikna u heh ba dei khmih halor ki kam ilekshon ha ka distrik.
Ka jingïakhun kaba ïakhaid bha ka dei ha Baramati, ha kaba u Symbud Myntri Rangbah u Ajit Pawar un ïakhun pyrshah ïa u khun-ruit bad kyrtong ka NCP jong ka kynhun u SP u Yugendra Pawar.
Ha Kothrud, u heh nongïalam jong ka seng BJP uba dei ruh u Myntri ka jylla, u Chandrakant Patil, un ïakhun pyrshah ïa u Chandrakant Mokate jong ka Shiv Sena UBT, uba dei u MLA barim.Katba ha Parvati, ka MLA ba mynta jong ka BJP, ka Madhuri Misal, la buh ban ïakhun beit beit bad ka Ashwini Jagtap, ka seng NCP SP. Ha Kasba, u Hemant Rasane ka BJP un ïakhun pyrshah ïa u MLA ba mynta jong ka seng Congress u Ravindra Dhangekar.
Ka Vadgaon Sheri ka don ïa u MLA ka NCP u Sunil Tingre ban ïakhun pyrshah ïa u kyrtong ka seng NCP SP u Bapusaheb Pathare. Ha Shivajinagar, u Siddhart Shirole ka BJP un ïakhun pyrshah ïa u Datta Bahirat ka Congress. Ka Pune Cantonment konstitwensi ka don u MLA ba mynta u Sunil Kamble uba ïakhun bad u nongïalam ka Congress uba dei ruh u Myntri barim u Avinash Bagve.
Ka Hadapsar ka pyni ïa ka jingïakhun hapdeng u Chetan Tupe ka NCP bad u kyrtong ka seng NCP SP u Prashant Jagtap. Ha Indapur, u Harshavardhan Patil, uba la kylla na ka BJP sha ka NCP SP, kaba la ïalam da u Sharad Pawar, u ïakhun pyrshah ïa u MLA ba mynta jong ka NCP, u Dattatray Bharne.
Kine ki jingïakop ki pynpaw ïa ka jinglong jingman jong ka saiñ pyrthei kaba thymmai ha Pune distrik. Ka Parvati ka la long tynrai ka jaka ba khlaiñ jong ka Congress. Wat lada la ai ïa ka shuki lai sien, hynrei ka NCP kam shym la ïoh ïa ka jingjop hangta. “Kumta nga la rai ban ïakhun”, la ong u Ulhas ïa uba la tip kyrteng kum u Aaba Bagul u dkhot ba pyrshah jong ka seng Congress. Kane ka la nang pynkhia shuh shuh ïa ka jinglong-jingman jong ka kam saiñ pyrthei kaba mynta ha ka thaiñ. “
Ka ilekshon Assembly jong ka Maharashtra kan sa long ha ka 20 tarik, Naiwieng, bad ka jingñiew vote kan sa long ha ka 23 tarik, Naiwieng. Kane ka por ilekshon ka long kaba kongsan bha na ka bynta baroh ki seng kiba don bynta namar ba ki ïakhun ban ïoh synshar ïa kine ki konstitwensi kiba kongsan.”
