Mumbai, Naiwieng:
U Myntri Rangbahduh Narendra Modi, u la sdang ban pynlong ïa ka jingïalap ilekshon Assembly jong ka Maharashtra, na Dhule, ha ka Sngi Thohdieng, da kaba kynnoh ïa ka Congress, ba ka pynlong ïa ki jingïapher hapdeng ki jaitbynriew bad ki riewlum, da kaba kynnoh ba ka seng, ka sngewsih ïa ka jingïai bteng ka jingdon jong ka kynhun Scheduled Caste, ki riewlum bad kiwei pat ki kynhun ba dang sahdien. “Ka jingpynïakhlad ïa ki jaitbynriew bad ki riewlum ka dei ka jingthmu kaba khraw tam pyrshah ïa ka ri India. Ek hain to safe hain (Lada iatylli te kata la ïoh jingïada),” u la pynbna.
U Modi u la maham ba ka kynhun Maharashtra Vikas Aghadi (MVA) ba ïalam da ka seng Congress kan pynkut noh ïa ka skhim Ladki Bahin lada jied ïa ka ha ka bor synshar. U la kynnoh shuh shuh ïa ka Congress bad ki seng ba la ïatreilang bad ka ba ki thmu ban pynduhjait ïa ka riti synshar ba la thoh da u B.R. Ambedkar da kaba wad ban pynïoh biang ïa ka Article 370.
“Ka Congress kam dei ban pyrshang ban pyntreikam ïa ka mat treikam jong ka Pakistan ha Kashmir. Nga kut jingmut ban pyntreikam ïa ka Riti synshar ha Kashmir. Ym don ba lah ban pyntreikam biang ïa ka Article 370 ha Kashmir,” la pyntikna u Modi.
Haba kren ha ka jingïalap ilekshon jong u ha ki thaiñ Dhule bad Nashik jong ka North Maharashtra, u Modi u la pynkynmaw ïa ki nongthep vote kumno u Dhule u la kyrshan ïa ka jingkyrpad jong u ban ïoh ïa ka sorkar BJP ha u snem 2014, da kaba wad ïa ka jingkyrshan kaba thymmai na ka bynta ka sorkar Mahayuti.
U la kynnoh ba ka MVA ba la ïalam da ka Congress ka thmu ban pynduh noh ïa ka skhim Ladki Bahin, kaba ai jingkyrshan T.1,500 shibnai. “Ka BJP bad ka sorkar Mahayuti ki thmu ban pynkupbor ïa ki kynthei. Hynrei ka MVA ba la ïalam da ka Congress kan weng noh ïa ka skhim Ladki Bahin lada ki wan ha ka bor. Ki kynthei ki donkam ban husiar bha ïa ka MVA, kaba khlem kyrshan ïa ka jingpynkupbor ïa ki kynthei,” la maham u Modi.
