Bengaluru, Naiwieng:
U Chairman jong ka Joint Parliamentary Committee halor ka Waqf (Amendment) Bill u Jagdambika Pal ha ryngkat u Tejasvi Surya ki la ïoh pdiang palat 500 tylli ki dorkhas na ki nongrep hadien ba la mih ka jingïakynad halor ka mat ba ïadei bad ka khyndew jong ka Waqf ha Karnataka. U Chairman jong ka Joint Parliamentary Committee on the Waqf (Amendment) Bill u Jagdambika Pal, u la leit jngoh bad pynlong ïa ka jingïalang bad ki nongrep, kiba ïa ka jaka jong ki, la pynbna kum ka jaka jong ka Waqf ha Karnataka.
U Chairman ka JPC u la leit sha Vijayapura halor ka jingkyrpad jong u dkhot ka JPC uba dei ruh u MP ka Bengaluru South u Tejasvi Surya, ban sngewthuh ïa ka jingeh jong ki nongrep halor ki jaka rep jong ki ba la dawa da ka Waqf Board.
Hadien ba la ïoh ban ïakren bad ki nongrep u Chairman ka JPC u la ong ba u la ïoh ïa ka dorkhas na ki nongrep bad un sa wanrah ïa ka ha khmat ka JPC.
“Ki nongrep ki la iakynduh ïa ngi bad ki la ai ïa ka dorkhas bad ki la ong ba ki ju leh ïa ka kam rep ha ka jaka la bun spah snem bad ki don ïa ki kot ki sla jaka na ka bynta kata hynrei mynta ngi ïoh shithi na ka board. Kumta hato ngin sa aiti ïa ka dorkhas ha khmat ka JPC,” ong u Jagdambika Pal haba kren bad ki lad pathai khubor ha ka sngi Palei.
U MLA ka BJP u Basanagouda Patil Yatnal uba la don lang ha kane ka jingleit jngoh jong u Pal u la ong “U Chairman ka JPC bad u Tejasvi Surya ki la leit jngoh mynta ka sngi bad ngi la dawa ba baroh ki jingdon-jingem jong ka Waqf dei ban pynbna kum ki jingdon-jingem jong ka ri bad ki la pynthikna ïa ngi ba ïa ki jingdawa jong ngi yn sa ïakren ha ka jingïalang jong ka JPC. Bad baroh ki kynhun nongrep yn khot sha Delhi bad yn sngap ïa ki.”
Ha Vijayapura District, Karnataka, ka la don ka jingkiew kaba jur bha ha ka jingdawa jaka da ka Waqf Board, kaba la ktah ïa ki jaka jong ki nongrep, ki Temple, ki ïing sorkar, bad wat ïa ki jaka sahnam ba la ïada da ka sorkar kmie hapoh ka Archaeological Survey of India (ASI).
Kane ka jinglong jingman ka la wanrah ïa ka jingeh kaba khraw ïa ki nongrep bad ki trai jaka, kiba sakhi ïa ka hok jaka jong ki ha ka pateng ba la tuklar khlem ka jingpynbna kaba biang ne ka rukom treikam kaba dei. Palat 15,000 akar tang ha ka Elaka Vijayapura la dawa, kynthup ïa ki jaka rep jong ki kpa tymmen kiba pawkhmat na ka bynta ka jingim jong ki nongrep trai ri.
Palat 1,500 akar ki jaka rep ha kylleng ki 89 tylli ki jaka ba la jurip tang ha ka shnong Honavada ha Tikota Taluk la dawa shiliang kum ka jaka jong ka Waqf, ong ka kyrwoh khubor. Kiba bun ki nongrep ha Babaleshwar Taluk ki la ïoh ruh ïa ki jingpynbna ba ki jaka jong ki mynta ki la shah kheiñ kum ki jaka jong ka Waqf katkum ka aiñ Waqf.
Ki jingdawa ki poi sha ki temple bad ki jaka ki Mutt, kum ka Someshwara Temple (ka por jong ki Chalukyan) bad ka Virakta Mutt (kaba la buh ha ka spah snem kaba 12), la bynrap shuh shuh ka kyrwoh.
U MP u Tejasvi Surya u la kyrpad ha ka taïew ba la lah ïa u Chairman ka JPC ban leit jngoh ïa ka Vijayapura bad ban sngewthuh ïa ka jingeh jong ki nongrep hapoh ka sorkar Congress ha Karnataka.
Haba kren sha ki lad pathai khubor ha kaba ïadei bad kane ka jingleit jngoh, u Surya u la ong, “Nga ai khublei ïa u Chairman ka JPC Jagdambika Pal uba la pyllait por ban ïakynduh ïa ki nongrep jong ka Vijayapura, Hubballi, Belagavi bad kiwei kiwei ki thaiñ jong ka North Karnataka ban sngewthuh ïa ka jingeh jong ki jaka rep jong ki kiba la kam trai bakla ïa ki da ka Bord Waqf.”
“Ka jingkiew stet jong ki jingjia ha Karnataka ha kaba ki jaka rep ki shah kam trai ha ka Board Waqf jong ka Jylla ka jia ha ka por ba ka kynhun ba ïatreilang jong ka Parliament halor ka aiñ Waqf (Amendment) Bill, 2024, ka dang ïakynduh ban pyrkhat halor ki jingpynkylla na ka bynta ka aiñ Waqf, 1995. U Myntri ka Minority Affair and Waqf jong ka Karnataka u Zameer Ahmed Khan, u la ju pynlong ïa ki ‘Waqf Adalat’ ha ki ba bun ki bynta jong ka jylla, kum kine ki Waqf Adalat, kim don kano kano ka kyrdan kaba biang katkum ka Riti synshar lane kino kino ki kyndon jong ka Revenue Department Rules,” u la bynrap.
“Ki dkhot jong ka Bharatiya Janata Party (BJP) ki la pynmih ïa ka sur jong kum kine ki nongrep bad ki la dawa ba dei ban pynphai biang ïa ki jingkylla ha ka rekod khajna, kynthup ïa ki jingkylla ba shiliang ha ka RTC, ka Mutation bad ka Pahani ba la leh khlem da ai wat ïa ki jingpynbna sha ki trai jaka ba ïadei kam, bad ki Waqf Adalats ki bym ïahap bad ka Riti synshar dei ban pynsangeh noh mardor. Hynrei u Myntri Rangbah u Siddaramaiah u la pynbna tang da ki dak ban pyndam noh ïa kino kino ki jingpynkylla ba dang shen ha ki rekod khajna jong ka Waqf Adalats ym shym la pynsangeh bad ïa ki jingpynbna ym shym la weng noh sha baroh ki nongrep kiba ïadei haduh mynta,” ong shuh shuh u Surya.
Ha Vijayapura district, na ki 4,373 tylli ki jaka jong ka Waqf, ki don tang 14 tylli ki skul, 2 tylli ki hostel, 7 tylli ki kolej bad kawei ka jaka ri khunswet, katba kiba sah ki long 1,311 tylli ki masjid, 649 tylli ki Dargah, 583 tylli ki jaka tep briew bad 23 tylli ki Madrasa.
Kaba kham pher ka long ba 43 tylli ki jaka ba la ïada da ka ASI ha Vijayapura, kynthup aï ka Gol Gumbaz bad ka Ibrahim Roza, ki dei kiba la shah kam trai da ka Waqf Board naduh u snem 2005.
Ki jingwan kurup bad ki jingtei khlem jingbit ki la jia ha kine ki jaka, kaba la ktah ïa ka dor jong ka pateng jong ki. Ki jingkyrpad jong ka ASI ban pynbeit ïa ki jingthoh la iehnoh beiñ, la kynnoh ba ka dei hapoh ka jingpynbor jong ka Waqf Board.
