New Delhi, Naiwieng:
Ha ka sien kaba nyngkong, ka tnad ki kam pohïing ka la mynjur ïa ka rai ban thaw ïa ka kynhun shipai kynthei jong ka Central Industrial Security Force (CISF ) kaba kynthup ïa palat 1,000 ngut ki shipai. Ka tnad kaba la thmu ban pyntreikam halor kane, ha ka lah sngi U Blei ka la mynjur ban wanrah ïa kane ka kynhun ba kyrpang jong ki kynthei ba la khot “Reserve Battalion” ha ka CISF, kaba don baroh 1,025 ngut ki shipai, ba la ïalam da u Senior Commandant-Rank Officer, la ïathuh ka lad pathai khubor. Ka tnat CISF ka la sdang ïa ka jingpynkhreh na ka bynta ban thungkam shwa ban ai jinghikai ïa kane ka kynhun shipai kaba thymmai.
Ka la sdang ruh ban wad ïa ka jaka treikam kaba thymmai na ka bynta ka kynhun shipai kaba don baroh ki kynthei. Ki tyllong khubor ba la wan na ka tnat CISF ki la ïathuh ba ïa kane ka jinghikai la shna kyrpang ban thaw ïa ka Elite Battalion, ka ban lah ban leh ïa ki kam kiba bun jait, kynthup ki Commando ha ka jingpahara ïa ki VIP bad ruh ban pynïaid ïa ka jingpahara ïa ki kad liengsuiñ, ka Delhi Metro, bad kiwei kiwei. Kaba kham kongsan ban pynpaw hangne ka long ba ka tnat CISF ka don 12 tylli ki kynhun shipai ba la buh kyrpang kumba ka long mynta, kiba don ïa ka jingkhleh lang jong ki shipai shynrang bad kynthei.
Kane ka kynhun shipai ka don ka jingïadei kaba khraw bad ki kynthei nongleit nongwan bad ki nongwan jngohkai ha ki jaka kum ki 68 tylli ki kad liengsuiñ paidbah kiba ka don bynta ha ka jingpahara, ka Delhi Metro bad ki jaka sahnam kum ka Taj Mahal bad ka Red Fort. Ka la don lypa ki nongtrei kynthei kiba la pyntrei ha kine ki jaka treikam. Ïa ka jingtyrwa ban thaw ïa ki kynhun shipai baroh ki kynthei ha ka kynhun shipai la sdang hadien ka jingbthah jong u Myntri ka tnat ki kam pohïing ka ri u Amit Shah ha ka sngi rakhe ïa ka 53rd Raising Day jong ki shipai ha u bnai Lber jong u snem 2023.
