Bengaluru, Naiwieng:
U Myntri Rangbah jong ka Karnataka u Siddaramaiah, u la kynnoh ha ka Sngi Balang, ba ka seng ka liang pyrshah ka BJP ka la thmu ban weng noh ïa ka sorkar ba la ïalam da ka Congress ha kane ka jylla, da kaba tyrwa `.50 klur marwei sha 50 ngut ki MLA ka seng Congress.
U Myntri Rangbah u la pynpaw ïa kane ka jingkynnoh ha Mysuru ha ka jingkren jong u hadien ba u la plie ïa ka projek ban pyntreikam na ka bynta ki paidbah kaba la kot sha ka `. 470 klur ha T Narasipura Assembly konstitwensi. Katkum ka jingong jong u Siddaramaiah, la ong ba ka BJP ka la pyndonkam da kaba kynnoh bymhok pyrshah ïa u bad ïa ka sorkar jong u namar ba ka jingthmu jong ka ban thied ïa ki MLA ka seng Congress kam shym la jop. “Ha kum kane ka por, ka BJP ka la pyrshang ban pynthut ïa ka sorkar jong nga. Ka BJP ka la tyrwa 50 klur sha uwei-pa-uwei u MLA na ka bynta 50 ngut ki MLA. Naei kane ka pisa ka wan? Hato u BSY (BS Yediyurappa) bad u (Basavaraja) Bommai ki shon ïa ki pisa? Naei ka pisa ka wan? Ka dei ka pisa bamsap bad ki don da ki klur bad ki pyndonkam ïa kane ban thied ïa ki MLA ha ka dor 50 klur tyngka.
Ki MLA jong ngi kim shym la mynjur, kumta ki la sdang ban pynthohbria ïa nga bad weng noh ïa nga.”U Siddaramaiah u la buh jingkylli ïa ka tyllong jong ka pisa ba la tyrwa bad u la ong ba ka dei baroh “ka pisa thok”.
U Myntri Rangbah u la jer kyrteng ruh ïa u nongïalam ka liang pyrshah u R Ashoka, u president ka BJP ha ka jylla u BY Vijayendra, ha kaba la kylli hato ki don ne em ki lad ban shon pisa ban tyrwa pisa haduh katne ban pynbam pisa ïa ki nongïalam ka seng Congress.
Ka BJP bad ka Congress ki don ha ka thma kaba jur jong ki jingkynnoh bad ki jingkynnoh pyrshah. Dang shen, ka BJP ka la kdew kti ïa ka Congress namar ka jingkynnoh ba ka leh ïa ka politik pynsngewbha da kaba ai bhah saw Percent ïa ki Muslim ha ki Tender jong ka sorkar.
Ka BJP ka la kynthoh ruh ïa ka sorkar ba pynïaid da ka Congress ba ka don ka jingleh bamsap ha ka jingai jaka ïa ka Mysuru Urban Development Authority, ka jingknieh jaka jong ka Waqf bad kumjuh ruh ka jinglum bainong na ki nongkhaïi kyiad ha ka jylla.
Ha kawei pat ka liang, ka Congress ka dang tohkit ïa ka jingpyndonkam bakla bad jingbamsap ïa ka pisa Covid-19 ha ka por ba synshar ka seng BJP.
