Srinagar, Naiwieng:
Ka National Investigation Agency (NIA) ka la kurup ïa ki jingdon-jingem jong uwei u lehnoh ba snar uba la shah kynnoh donkti ha ka jingpynïap ïa ar ngut ki briew ki bym dei ki trai shnong ha Kashmir mynta u snem, la ïathuh ka tyllong khubor ha ka Sngi Palei.
Une uba la shah kynnoh u dei ba la tip kyrteng kum u Adil Manzoor Langoo, uba don jingïadei ruh bad ka ‘The Resistance Front (TRF)’, kaba dei ka kynhun kaba don jingïadei bad ka kynhun lehnoh Lashkar-e-Taiba (LeT) kaba don ha Pakistan, la ong ka khubor.
Katei ka jingpyntreikam, ka long shi bynta jong ka jingtohkit ha kaba ïadei bad ka mukotduma, kaba ïadei bad ka jingïasuhbuit sniew ba la thaw da u Langoo, ryngkat bad ar ngut kiwei pat, kiba la ithuh kum u Ahran Rasool Dar bad u Dawood.
“Ha ka jingïalam jong ki heh ka kynhun TRF bad LeT kiba ha Pakistan, kane ka jingthmu ban pynïap ïa ki briew kiba lui-lui ha India ka long da ka jingthmu ban pynsaphriang ïa ki kam pyntriem jong ki lehnoh bad ban wanrah ka jingtieng jingsyier bad ban pynmih ïa ki jingïakynad,” ong ka kyrwoh khubor.
Na ka jingpynlong ïaka jingtohkit la ïoh ban kem ïa u Langoo, u Dar bad u Dawood hadien ka jingjia jong ka jingshah pynïap jong ki ar ngut ki briew ki bym dei ki trai shnong ha ka 7 tarik, Rymphang, ha kaba u snar nongïalam halor kane ka kam thombor uba dei na Pakistan u Jahangir u dang lait im na kti jong ka aiñ, la bynrap ka tyllong khubor.
Ïa ka tiar ba la pyndonkam ha kaba leh ïa katei ka kam runar la lap, ryngkat bad ki tiar siat, “na kawei ka ïingheh” kaba la aiti sha u kpa jong u Langoo bad katto-katne kiwei pat da u trai jong ka, ong ka kyrwoh khubor.
Ïa kane ka jaka, kaba don ha Zaldagar, Srinagar, la kurup ha ka Sngi Balang hapoh ka jingtreikam jong ka kyndon 25 jong ka Unlawful Activities (Prevention) Act, 1967, la bynrap ka kyrwoh khubor.
U Langoo, uba la shah kem ha ka 12 tarik, Rymphang, u la shah pynngat ha ka mukotduma ryngkat bad kiwei pat kiba la shah kynnoh ha u Nailar bad mynta u don ha Central Jail ha Srinagar, la ong ka kynhun tohkit.
“Ki jingdon-jingem jong u Adil Manzoor Langoo ki la shah kurup ha kaba ïadei bad ka jingjia jong ka jingpynïap ba shyrkhei ïa kine ki ar ngut ki briew ha Shala Kadal, Srinagar, ha u bnai Rymphang jong une u snem,” la bynrap ka kyrwoh khubor.
Kum shi bynta ban pyntroiñ bad pynjem khnap ïa ka kynhun lehnoh ha Kashmir, ka NIA ha ka Sngi Balang ka la kurup ïa ki jingdon- jingem ki bym lah ban pynkhih jong u nongïalam ka kynhun lehnoh kaba ïatreilang bad ka LeT, ka TRF, la ong ka kyrwoh khubor.
Ka TRF, kaba la paw ha u snem 2019 kum ka kynhun ba ïadei dur ne shim ïa ka jaka jong ka kynhun LeT, ka la shah ñiew ruh kum ka seng lehnoh.
Ka la donkti ha ki katto katne ki jingthombor bad jingpynïap ïa ki ‘riew paidbah ki bym dei ki trai shnong ha Kashmir, kynthup ïa kito kiba dei na ki jaitbynriew rit paid ha ka jingngeit niam.
Kane ka kynhun ka don ruh ha lyndet jong ki katto katne ki jingshah thombor jong ki bor pahara jong ka India kynthup ïa ki pulit ka thaiñ, la ong ka kynhun NIA.
