Shillong, Naiwieng 21
Ka Central Recruitment Board (CRB) ka tnat Meghalaya Police (MLP) ka la pynsangeh shuwa shipor ïa ka Physical Efficiency Test (PET) namar ka jingshem ïa ki jingduna bad jingbym biang ha ka jingpynlong ïa kane ka eksam ha 1st MLP Battalion Mawïong bad 4th MLP Battalion ha Sohpian.
La ong ba hadien ba ki khynnah samla kiba la thep kam pulit bad kiba la pyndep ruh ïa ka PET kaba la pynlong da ka tnat pulit jong ka Jylla na ka bynta ban pynïaid shakhmat ïa ka jingpynrung kam ha ka tnat pulit hapoh ka Jylla hi baroh kawei kaba la sdang naduh ka 18 tarik jong u Naiwieng 2024 bad kaba dang ïaid mynta la lai sngi kat haduh ka 21 tarik u Naiwieng 2024, hynrei hapdeng kane ka jingpynlong ïa ka PET la sakhi pat ba kiba bun na ki khynnah samla ki la pynpaw ïa ka jingbym sngewhun halor ka jingdkoh treikam, ka jingbym ïaid beit bad ka jingbym biang ka rukom thew ne shim jingkheiñ ïa ka wat kaba ki khynnah ki la dep ban mareh lyngba ki kor-ki bor kiba ka tnat pulit ka la pyndonkam.
La sakhi ruh ba na ka liang ki khynnah samla kiba la sngewthuh ba ki la leh bha ha katei ka jingmareh, ki la ïalum lang shi jaka ban pynpaw ïa ka jingbym hun halor ka jingmih (result) kaba ka tnat pulit ka la pynmih ha kine ki sngi bad kat haduh ka 21 tarik u Naiwieng 2024 ruh, ka jingthut jong ki kor-ki bor ka dang ïai jia kat haduh ba ka la pynlyngngoh ïa ki khynnah samla kiba la sah ruh hapdeng ka umdum.
Ka dei halor kane ka bynta ba na ka liang ka CRB jong ka tnat pulit ka Jylla lyngba u IGP bad uba long ruh u Chairman jong ka CRB, u Dalton P Marak ha ka kyrwoh khubor ba la pynmih paidbah ha ka 21 tarik u Naiwieng 2024, u la pyntip ba ka tnat ka la pynsangeh shisyndon ïa ka jingpynlong ïa ka PET jong ka tnat pulit naduh mynta ka sngi ka 22 tarik u Naiwieng 2024 kat haduh ban da pyntip da kumwei pat ha kaba ïadei bad ki tarik kiba dei ban mareh biang.
Shuh-shuh na ka liang u Dalton P Marak u la pyntip ruh ba namar ka jingdon ka jingthut ha ka liang ki kor-ki bor, kumta kum ka tnat pulit ka la rai ban ailad biang sa shisien ïa baroh ki khynnah ba kin mareh biang da kaba kyntu ruh ïa ki khynnah samla ba kin long kiba ïaishah lem bad ka tnat pulit katba ka dang don ka jingpynbeit ïa ki kynrum kynram khnang ba ka jingpynrung kam kan long kaba ïaid beit ïaid ryntih bad ong ba kino kino ki samla ki lah ban phone sha ka ophis treikam jong ka CRB ha u nombar-6033164273 lada ki don ïa kino kino ki jingkylli kiba kim sngewshai ne sngewthuh.
