Shillong, Jylliew 05
Ka Federation of Khasi Jaiñtia and Garo People (FKJGP) South West Khasi Hills District ha ka nohphai sngi jong ka 05 tarik u Jylliew 2025, ka la leit ban ïakynduh ïa u Symbud Myntri Rangbah ka Jylla, Bah Prestone Tynsong uba dei peit ïa ka tnad PWD ban pan jingshai halor ka jingpynheh ïa ka surok Weiloi-Mawkyrwat.
Ha ka jingïakren bad ki lad pathai khubor, u President ka FKJGP SWKHD, Bah Keness Nonglait u la ong, ba ka seng ka wan ban pan jingshai na u Bah Prestone halor katei ka surok, namar na ka liang u Myntri Rangbah ka Jylla u Conrad K Sangma u la pynbna ha ka 10 tarik u bnai Nohprah 2024, ban ong ba ïa kane ka surok na Weiloi haduh Kenïong la dep ban mang pisa haduh T.120 klur lyngba ka World Bank MITP-2 Road Project.
Kumta ka seng ka la wan ban pan jingshai na u Bah Prestone ba la dep shna ne em ïa ka DPR bad la dep ne em ban khot tender ïa kane ka surok kumba la pynbna.
U Bah Keness u la ong ruh ba na ka liang u Bah Prestone u la kren shai ba wat khuslai ha kaba ïadei bad kane ka surok namar kan long kam beit.
Ka seng ka la ïakren ruh bad u Bah Prestone Tynsong haba ïadei bad ka jingpynheh ïa ka surok Weiloi-Mawsynram shaduh Ranikor bad Weiloi-Mawkyrwat shaduh Ranikor. Halor kane ruh u Bah Prestone u la kubur ba ka kam kan ïaid beit shakhmat.
Ka surok two lane na jingkieng Borbasing haduh lad Alukoreng kaba don 4 kilomitre ka dei single lane bad kam don ïa ka jingthew kaba biang katkum ba la mang, katba na lad Alukoreng shaduh Nongjri-Baghmara ka jingheh ka biang, la ong u Bah Keness. Halor kane ruh ka seng ka la pan jingshai ba kaei ka daw kaba pynlong ïa kajuh ka surok ba kan pher ha ka jingheh.
Kumta, u Bah Keness u la ong ba ha ka jingïakren u Bah Prestone u la kular ba ïa kine baroh ba ka seng ka la wanrah un sa shimkhia.
Nalor kane, ka seng ka la kyrpad ruh ïa ki nongshong shnong jong ka thaiñ ba ynda la pyntrei ïa kane ka surok kin ai ka jingïatreilang, khnang ba ka jingmyntoi hapoh ka District kan ïaid beit ïaid ryntih, namar kumba ong ba ka surok ka dei u budlum jong ka ïoh ka kot.
