Shillong, Jylliew 05
Uwei u samla Khasi uba dei napdeng phew ngut ki nongtrei ka tnat National Disaster Response Force (NDRF) na Guwahati u la pyni ïa ka jingshlur ban hiar haduh arsien ïa ka riat kaba jylliew ha Wei Sawdong ban leit wad ïa ka Sonam Raghuvanshi.
Haba une u samla Khasi ba la tip kyrteng kum Mathew Lyngdoh u la hiar marwei sha ka riat, la pyndait ïa u da ki tyllai kiba la ap da ki para nongtrei kiba ïeng hajrong ban bat skhem khnang ban ym don ka jingbakla.
Haba u Bah Mathew u la hiar sha riat la pynher artad ïa u drone ban wad ïa ka Sonam Raghuvanshi kaba dang jah rngai haduh mynta.
Une u samla Khasi u la hiar ïa ka riat Wei Sawdong ha ka 4 tarik Jylliew na kawei ka jaka bad mynta ka sngi ka 5 tarik Jylliew u la hiar na ki bynta kham shaneng ba lap ïa ka met u Raja Raghuvanshi.
La pyntip ba u Bah Mathew u la hiar ïa ka riat kaba jylliew hynrei um shym la ïohi dak eiei. Pynban um treh shuh ban wanphai biang da u tyllai hynrei u la wanphai noh da kawei ka lynti ryngkat ki pulit ka State Disaster Response Force kiba la don lypa shapoh riat.
La ïathuh ba nalor ka riat kaba la hiar u Bah Mathew haduh 150 metre, lada ïaid biang kham sharum ka jingjrong ka riat ka long sa 130 metre eiei kaba don sa kawei ka riat kaba kham jylliew shuh shuh.
Ka jingleit wad bunsien sha kane ka riat namar ki suba ba ka Sonam ka lah ban sahkut ha shiteng riat namar ïa ka met jong u Raja Raghuvanshi la lap na kane ka riat Wei Sawdong hynrei khlem ïohi dak eiei haduh mynta ka sngi ka 5 tarik Jylliew kaba la ïaid haduh 14 sngi lynter naduh ba ki la jah ha ka 23 tarik Jymmang 2025.
Kumjuh, ka kynhun jong ka State Disaster Response Force kiba la hiar lypa shapoh riat ki la pyrta mar shu hiar u samla Khasi u Bah Mathew Lyngdoh uba trei ha National Disaster Response Force ban hiar sha riat Wei Sawdong ban leit wad ïa ka Sonam Raghuvanshi.
Ka jingphah hiar ïa u samla Khasi shapoh riat kaba jylliew ka dei namar u kham rit briew bad kham satar.
