Shillong, Jylliew 05
Ka suiñ bneng ha ka Sngi Palei ka 5 tarik Jylliew, 2025, ka la ailad baroh shisngi ban leit wad ïa ka Sonam Raghuvanshi sha sawdong sawkun jong ka riat Wei Sawdong hynrei shwa ban sep ka sngi ka khlem pyni soh bad dak eiei.
Kum ban shu pynkynmaw, u slap bad u lyoh uba rben u la wan hap, kaba la sdang naduh ka 28 tarik Jymmang, 2025 ha ka por 4;00 baje janmiet haba ki pulit bad ki SDRF ki la bteng ban wad ïa kine shikurim ha Domlakhiat bad Nongriat.
Kumjuh, u slap uba la sangeh ha ka 2 tarik Jylliew la ïoh lad ban pynher ïa ka drone bad la lap ïa ka metïap u kurim u Raja Raghuvanshi na ka riat Wei Sawdong ka lynti ban ïaid na Laitduh sha Domlakhiat.
Hadien ba la lap ïa ka met u Raja, ka suiñ bneng ka la bteng biang ban hap slap bad lyoh uba rben kaba la pynthut ïa ki pulit ka Sohra Civil Sub Division, ki NDRF bad SDRF.
Hynrei ha ka Sngi Palei, ka suiñ bneng ka la rang bad mih sngi kaba long kumba ailad ban leit wad baroh shisngi ïa ka Sonam ha ka jaka ba la lap ïa ka met u Raja hynrei khlem pyni dak eiei.
Haba u nonglum khubor U Nongsaiñ Hima uba la hiar buddien biang, haba la poi sha jaka ïeng kali ha Wei Sawdong la lap ba ki pulit jong ka tnat State Disaster Response Force ki la dep hiar shapoh riat da kaba teh ïa u tyllai ha u tynrai dieng kaba don hajan ka surok.
Katba ki pulit ka National Disaster Response Force kiba wan na Guwahati ki la pynïeng ïa u nar ban pyndait ïa u tyllai ban phah hiar biang ïa u samla Khasi u Bah Mathew Lyngdoh.
Kumjuh, ha kane ka sngi, ki nongbatai ïa ki nongjngohkai pyrthei kaba la tip kum ka Tour Guide Association of Meghalaya Sohra Unit hapoh ka jingïalam u Bah Gilbert Khongsit, President ki la wan ïarap ban leit wad lang.
Ha kane ka sngi u Bah Alan West Kharkongor uba dei u nongaibuit ka Hima Sohra haba ïadei bad ki kam jngohkai pyrthei u la poi ha jaka ïeng kali ha Wei Sawdong.
Nangta ruh u hynmen jong ka Sonam Raghuvanshi u Govind Raghuvanshi u la wan poi lang sha jaka ïeng kali ha Wei Sawdong ban ap khubor haba ki kynhun bapher bapher ki la hiar sha riat ban lei wad.
Haba kine ki kynhun kiba la hiar ban wad kylleng sawdong ka riat Wei Sawdong kim shym la sma ne kim shym la don dak eiei, ki la sangeh noh bad kin bteng ban wad sa lashai ka sngi.
Na ka liang ki pulit ruh ki la sah ha ka umdum namar lashai ka sngi kim pat tip sa shaei ka jaka kin leit wad biang ïa ka Sonam haba kim lapdien shuh.
Kum ban shu pynkynmaw kine ki shikurim ki la poi sha Domlakhiat ha ka 22 tarik Jymmang da ka scooty ban ïaid da ka kjat sha Nongriat bad ki la wanphai ha ka 23 tarik mynstep hynrei naduh kane ka sngi ki la jah bad lap ïa ka scooty na Sohrarim.
Haba ki pulit ki la lap ïa u kurim, u Raja Raghuvanshi ha ka 2 tarik Jylliew, ki la pyrshang ban wad sa ïa ka kurim ka Sonam Raghuvanshi hynrei tad haduh mynta kim lapdien shuh.
