New Delhi, Naiwieng:
Ki nongïalam jong ka liang pyrshah ha ka Sngi Ba-ar ki la dawa ba la dei ban don da ka tyrko nia halor ka Riti Synshar ha baroh ar tylli ki ïingdorbar jong ka Parliament, da kaba pynksan ba ka long kaba donkam na ka daw ki jingjia kiba dang shen hapoh ka ri.
U nongïalam jong ka liang pyrshah ha Rajya Sabha u Mallikarjun Kharge u la ïathuh ba ma u bad u Rahul Gandhi uba long u nongïalam ka liang pyrshah ha Lok Sabha ki la thoh da ka shithi sha ka shuki ki Lamphang ha baroh ar tylli ki ïingdorbar da kaba kyrpad ba dei ban pynlong ïatyrko nia halor ka Riti Synshar ka ri na ka bynta ar sngi ha baroh ar tylli ki ïingdorbar.
“Dei ban ai bad pyllait por na ka bynta kata khnang ba yn lah ban ïakren ïa kiei kiei kiba bha tam shaphang ka Riti Synshar, bad ïa kiei kiei kiba bakla kiba jia mynta ruh yn lah ban ïakren. Nga bad u Rahul Gandhiji ngi la thoh shithi, ngi dang ap ïa ka jubab jong ka sorkar,” ong u Kharge naba ka ri ka dang rakhe ïa ka jingdap 75 snem jong ka jingpdiang ïa ka Riti Synshar ka ri.
U heh nongïalam jong ka seng Congress u Digvijay Singh, u la buh ka jingkylli lada ïa ka Preamble jong ka Riti Synshar la pyntreikam ha ka shithi bad ka bor pyrkhat.
“Hato ki briew ki ïoh ïa ka jingbishar bahok, ka jinglaitluid? Tang ka jingdem ngon ïa ka Riti Synshar kan ym ïalam sha ka lada dei tang ban bud ïa ka”, u la ong.
U nongïalam ka Congress, u Gaurav Gogoi, u la ong ba ka don ka jingpynkhreh shwa ïa ki jingïatyrko nia ba la pynlong ha Parliament ha ki por ba don ki jingrakhe ïa ka jingdap 125 snem jong u BR Ambedkar, bad ka jingrakhe dap 75 snem jong u Bharat Chhodo Andolan.
