New Delhi, Naiwieng:
Ka Cabinet Committee on Economic Affairs (CCEA) ba la pynïaid da u Myntri Rangbahduh u Narendra Modi ha ka Lah Sngi U Blei ka la mynjur ban pdiang ïa lai tylli ki projek jong ka tnat Railway kiba kynthup ïa ka jingbei tyngka kaba T. 7,927 klur.
Kine ki projek ki long ka Manmad 4th line (160 km), Bhusawal – Khandwa 3rd & 4th line (131 km) bad Prayagraj (Iradatganj) – Manikpur 3rd line (84 km), la ong ka kyrwoh khubor ba la pynmih hadien ka jingïalang jong ka CCEA.
Ki projek ba bun ba la tyrwa kin pynsuk ïa ki jingtreikam bad pynduna ïa ka jingkhapngiah, da kaba ai ïa ka jingpynroi ïa ki jingtei kiba donkam bha ha ki bynta kiba bun briew tam hapdeng ka Mumbai bad ka Prayagraj, la ïathuh ka kyrwoh khubor.
Ki projek ki long shi bynta jong ka PM-Gati Shakti National Master Plan na ka bynta ka jingpynïasoh ba bun rukom kiba la lah ban long lyngba ka jingpynkhreh lang bad kan ai ka jingpynïasoh kaba khlem buh jingeh na ka bynta ka leit ka wan jong ki briew, ka jingkit ïa ki mar ki mata bad kiwei pat ki jingshakri.
Ki lai tylli ki projek kiba kynthup ïa ki hynñiew tylli ki distrik ha ki lai tylli ki jylla kata ha Maharashtra, Madhya Pradesh bad Uttar Pradesh kin pynïar ïa ka lynti ba la don lypa jong ka tnat Indian Railway da kumba 639 km.
Ki projek Multi-Tracking ba la tyrwa kin pynbha ïa ka jingpynïasoh sha ki ar tylli ki distrik ba don jingthmu ban pyntreikam kiba kynthup ïa ka Khandwa bad Chitrakoot kiba shakri kumba 1,319 tylli ki shnong bad kumba 38 lak ngut ki nongshong shnong.
Ki projek ba la tyrwa kin kyntiew ïa ka jingpynïasoh ha shi lynter ka lynti ïaid na Mumbai-Prayagraj-Varanasi da kaba pynlah ban pynïaid ïa ki rel ba kit ïa ki nong-leit jingleit ba la pyndap, kaba ai jingmyntoi ïa ki briew kiba dei ban leit sha Jyotirlingas ha Nashik (Trimbakeshwar), Khandwa (Omkareshwar), bad Varanasi (Kashi Vishwanath) bad kumjuh ki jaka leh niam bad leh riewblei kiba don ha Prayagraj, Chitrakoot, Gaya, bad Shirdi.
Nalor kata, ki projek kin kyntiew ïa ka kam jngohkai pyrthei lyngba ka jingpynbha ïa ka lad ban leit sha ki jaka jngohkai bapher bapher kum ka Khajuraho UNESCO World Heritage Site, Ajanta & Ellora Caves UNESCO World Heritage Site, Devgiri Fort, Asirgarh Fort, Rewa Fort, Yawal Wildlife Sanctuary, Keoti Falls, bad Purwa Falls bad kiwei kiwei pat.
Kine ki dei ki lynti kiba donkam bha na ka bynta ban kit ïa ki mar kum ki mar rep, sboh, dewïong, Steel, dewbilat, ki jingbuh jingsat, bad kiwei kiwei.
Ki jingpynbit pynbiang ïa ka jingpyntreikam kin wanrah ïa ka jingkit jingbah kaba kham bun kaba haduh 51 MTPA (Million Ton ha ka shisnem).
Ka lynti rel namar ba ka long ka rukom kit kaba ïadei bad ka mariang bad kaba pyndonkam ïa ka bording, kan ïarap ha baroh ar ha kaba pynurlong ïa ki thong jong ka jinglong ka suiñbneng bad ban pynduna ïa ka jinglut jingsep jong ka ri, ban pynduna ïa ka jingmih ka CO2 kaba ïaryngkat bad ka jingthung ïa ki 11 klur tylli ki dieng, la bynrap shuh shuh ka kyrwoh khubor.
