New Delhi, Naiwieng:
U Sanjay Singh, uba dei u MP jong ka seng Aam Aadmi Party Rajya, u la kyrpad ban buh da ka jingmudui Suspension of Business ha Rajya Sabha katkum ka kyndon 267 ha ka sngi Thohdieng, da kaba dawa ban ïatai nia halor ka “jingkiew jong ki kam sniew ha ka nongbah jong ka ri”, la ïathuh ka tyllong khubor.
Katkum ka jingïathuh ka tyllong khubor, la ong ba une u nongïalam jong ka seng AAP, ha ka jingthoh ba ai jingkyrshan halor kane ba la phah sha u Secretary General jong ka Rajya Sabha, u la thoh, “Nga kwah ba phin pyrkhat bad phai ha kaba ïadei bad ki jingbun jong ki kam sniew ha ka nongbah jong ka ri. U Myntri Rangbahduh, u Myntri ba dei khmih ïa ki nonglamktien ka ri bad ki MP na baroh ar tylli ki ïingdorbar ki don ha Delhi. Ka nongbah jong ka ri ka la kylla long ka nongbah jong ki kam sniew.”
U Singh u la buh ruh da ka Suspension of Business Notice ha ka sngi Balang ha kaba la dawa ba la dei ban ïakren bad ïamir jingmut halor ki jingbun bad jingnang jia ki kam sniew ha ka nongbah jong ka ri.
Katkum ka jingpynbna jong u Singh, u la kdew shai da kaba ong, “na ka jingkheiñ na ki kot khubor ba kham paw,” ki pynpaw ïa ka jingkiew jong ki kam sniew ba har rukom, kum ka jinglute, ka jingpyrshang ban pynïap briew, bad ki kam runar kiba long pyrshah ïa ki kynthei bad ki tymmen ki la nang jur.
“Ki jingkheiñ na ki kot khubor ba paw jong u snem 2024 ki pynpaw ïa ka jinglong jingman kaba sngewkhia jong ki kam sniew ha ka nongbah. Ki kam lute ki la kiew da 23 pc, ki kam tuh da 25.2pc katba ki jingpyrshang pynïap briew ki la kiew da 18pc,” la ong u Singh ha ka jingpynbna, kumba la ïathuh ka tyllong khubor.
Ka jingpynbna ka la ong shuh shuh, “Ka Delhi ka don ha khlieh duh ha ka thup jong ki kam runar pyrshah ïa ki kynthei napdeng ki Metro. Kane ka pyni shai ïa ki jingduna ha ka jingtreikam jong ka aiñ ha ka synshar- khadar.” “Ka jingkiew jong ki kam runar pyrshah ïa ki kynthei bad ki tymmen, bad 878 tylli ki jingjia aksiden surok kiba shim ïa ka jingim jong ki briew ki long ki jingjia ba kham jur bad kane ka wanrah ïa ki jingsngewkhia. Ka Delhi ka don ha ka jingtieng namar ki thma kynhun runar ha surok bad ki jingjia jong ka jingdawa pisa be-aiñ na ki nongkhaïi,” la bynrap shuh shuh u Singh.
U la pyntip ruh ba ki la don ki jingbyrngem buh bom ha ka nongbah jong ka ri, da kaba khot ïa ka “jingbymlah jong ka rukom pahara,” haba kum kine ki jingbyrngem ki dang ïai bteng ha New Delhi.
“Ki jingbyrngem buh bom ba dang shen ha Delhi ha une u snem 2024 ki la wanrah sha khmat ïa ki nongleh kam sniew ki bym tieng ïa ki rukom pyntreikam jong ka tnat ba dei khmih bad pyrshang ïa kane ka kam naduh ka Parliament jong ka ri haduh ka AIIMS, kaba pyni ïa ka jingbymlah leh eiei jong ki bor pahara,” ong u Singh.
Katkum ka jingïathuh ka tyllong khubor, u Singh u la ong ba ha une u snem ba la dep, ki la don palat 1 lak 70 hajar tylli ki kam sniew ba la buh jingujor da ki pulit ka Delhi.
“Ki 1,74,253 tylli ki kam sniew ba la buh jingthoh da ki pulit ka Delhi ki kynthup ïa ki kam pynïap briew (308 tylli), ki kam tuh (1,034), ki kam tuh na ïing (5,735) bad ki kam tuh kali (25,140). Wat la ki kam runar ba la pynbeit ryntih ki nang kiew, hynrei ka jingwad jingkheiñ ïa ki kam tuh ha ïing (26 pc) bad kiwei kiwei ki long kiba duna haduh katta-katta,” u la ong. U la bynrap ha ka jingpynbna, “Kane ka pynshai ba ki lad ki lynti kiba la don lypa kim shym la lah ban pynthikna ïa ka jingshngaiñ jong ki paidbah.”
