Shillong, Nohprah 02
56 ngut ki briew ki la ïap bad katto-katne ngut ki la mynsaw ha ka jingïakynad ha kawei ka madan ïalehkai phutbol ha Guinea hapdeng ki nongkyrshan, la ong ka Sorkar Guinea ha ka Lah Sngi U Blei.
Ki bor ba dei khmih ki dang pynlong ka jingtohkit ban lap ïa kiba donkti ha katei ka jingjia ha ka Sngi U Blei, la ong u myntri ka tnad Communications, u Fana Soumah ha ka kyrwoh kaba la pule ha ka telebishon jong katei ka ri.
Napdeng kiba la ïap, ki don katto-katne ngut ki khynnah katkum ka jingpynpaw ki lad pathai khubor katei ka ri.
Kane ka jingïakynad ka la jia ha ka janmiet jong ka Sngi U Blei ha madan ïalehkai ha ka nongbah Nzerekore ha ka jingïakhun phainal hapdeng ka Labe bad ka Nzerekore ban burom ïa u nongïalam shipai jong ka Guinea, u Mamadi Doumbouya, la ong u Myntri Rangbahduh ka Guinea, u Amadou Oury Bah ha ka rynsan X.
“Ha ka por ba don ka jingïakhih, la ïoh jingtip ïa ki nongshah pynjulor,” ong u Bah, khlem da ai jingtip bniah. Ki bor synshar katei ka ri ki dang ïaleh ban wanphai biang ka shong suk shong saiñ ha katei ka thaiñ,” u la bynrap.
Ki lad pathai khubor jong ka thaiñ ki ïathuh ba ki bor pahara ki la pyrshang ban pyndonkam da ka lyer pynsat khmat khnang ban pynjai-jai ïa katei ka jingïakhih hapdeng ki paidbah nongkyrshan.
“Katei ka jingïakajia ka la pynbitar ïa ki nongkyrshan kiba la kawang da ki maw bad na ka liang ki bor pulit ki la hap ban pyndonkam da ka lyer pynsat khmat,” la ïathuh ki khubor ha kaba la ong ba katto- katne na kiba la khlad bad mynsaw ki dei ki khynnah.
Katkum ki dur khih kiba la saphriang halor katei ka jingjia ki pyni ïa ki nongkyrshan kiba pyrta bad pyrshah ïa ka jingpynïaid ki rephri, shwa ba kin mih ka jingïakajia hapdeng jong ki.
Ki briew ki la mareh katba ki dang pyrshang ban phet krad na ka madan, bun na ki, ki la hap ban kiew na ki jingker ba jrong na ka bynta ban kynthih shabar jong ka stadium.
