Mawkyrwat, Nohprah 02
Ka Ribhoi United FC ka la rung sha ka semi final ha ka lympung ïalehkai Mawlangwir Invitation Football Tournament 2024-25 ba la pynïaid da ka Mawlangwir SC, hadien ba ka lah ban pynliem noh ïa ka Se-Lajong FC da 4-1 kol ha ka Lah Sngi U Blei.
Ha kane ka jingïakhun quarter final kaba long ha Rowell Lyngdoh Stadium kaba ha Saitsnad, Mawlangwir, u Meding Makdoh jong ka Ribhoi United u la ïoh ïa ka hat-trick da kaba thep marwei haduh kol kol.
Haba phai sha katei ka jingïalehkai, ka Ribhoi United ka la pyni ïa ka sap bad ka jingtbit ha ka rukom ïalehkai naduh kaba sdang ka jingïalehkai bad dei ha ka minit kaba 30 ba ka la ïoh ban pynkhih jar nyngkong eh da u Prygyan Gogoi. Hadien san minit kane ka kynhun ka la pynbud biang ïa ka kol kaba ar lyngba u Meding.
Haba wanphai sha ka kylla miet, na ka liang pyrshah ka Se-Lajong ka la ïakhun tyngeh ban ïoh ban pynphai ïa kitei ki kol, hynrei namar ka jingkhaiñ bor ki rangïalehkai ka Ribhoi kam shym la lah kyrda bad ha ka minit kaba 50 u Meding Makdoh u la thep biang ïa ka kol kaba ar ka jong u.
Hadien katto katne por ka Se-Lajong ka la lah ban pynphai kylla shi kol lyngba u Manbha Ïawphniaw ha ka minit kaba 60. Na ka jingkhlaiñ bor ki rangïalehkai, ka Ribhoi United ka la thep biang ïa ka kol kaba saw ha ka minit kaba 71 lyngba u Meding ban ïoh syndon ïa ka hat- trick bad pynlong ïa ka Ribhoi United ban ïoh jingjop.
Na ka liang ka Tour -nament Committee jong ka Mawlangwir Sports Club ka la pyntip ba ka jingïalehkai semi final kaba nyngkong kan long ha ka 10 tarik hapdeng ka Benris FC pyrshah ïa ka Mawlai SC ha ka por 1:30 nohphai sngi.
