Jowai, K’lyngkot 13
Ka The A Team, Thadmusem bad Ummulong ki la ïoh jingjop ha ka lympung ïalehkai Thadlaskeiñ Football League ba la pynïaid da ka Thadlaskeiñ Sports Association (TSA) ha ka Lah Sngi U Blei.
Ha kane ka jingïakhun kaba la long ha Wahïajer Stadium, ka The A Team ka la pynliem noh ïa ka Nangroi SC da 3-0 kol. Ïa kine kol la thep da u Cameo Lamare ha ka minit kaba 39, kumjuh u Ebor Bareh (54) bad Daomar Phalangki (57).
Ha ka jingïalehkai kaba bud, ka Thadmusem ka la jop da 2-0 kol ïa ka Khliehtyrshi SC. Ïa kine kol la thep da u Johnny Dkhar ha ka minit kaba 21 bad Lamphrang Dkhar (71).
Haba phai sha kawei pat ka jingïakhun kaba khatduh, ka Ummulong SC ka la lah ban pynliem noh ïa ka Lummuriap da 2-0 kol. Kane ka la wan urlong lyngba ki kol ba la thep da u Edify War ha ka minit kaba 16 bad Langmi Bamon (45).
Ka jingïalehkai ha ka Sngi Ba-ar kan long hapdeng ka Malngiang SC pyrshah ïa ka Nongkharai SC ha ka por 10 baje mynstep, kumjuh ka Takhniang SC ïa ka Morathud ha ka por 12 baje mynsngi bad ka Sohphoh ïa ka Tympang SC ha ka por 2 baje nohphai sngi.
