Shillong, Rymphang 10
Ka ding kaba klang katta-katta ka la ïoh ban bam duh ïa kawei ka kudam buh tiar kaba don ha Umsohsun mar pyrshah bad ka Bata Building, ha kaba baroh ki tiar ki tar ki la julor bad ingkhong lut hi khait.
Kane ka jingjia pluh ding jong katei ka kudam ka la jia ha ka step jong ka Lah Sngi U Blei ka 10 tarik ha ka por kumba 11 tam eiei. La ong ruh ba kane ka kudam buh tiar ka dei jong u Anuj Bawri kaba don ha ka Building Joavon Towers kaba la long trai da ka Kong Jone Manners.
La ong ba mar ïa ïoh jingtip halor kane ka jingkem ding, ki pulit pynlip ding ki la leit mardor sha katei ka jaka ban tem ïa ka ding shwa ba kan pur sha kiwei pat ki dukan.
Na ka liang u trai jong katei ka kudam, u Anuj, u la ïathuh ba ha katei ka kudam, ki don ki tiar Electronic kum ki kor computer bad kiwei kiwei bad ka jingjulor ka la poi sha ki T.70 lak eiei, namar baroh ki tiar kiba don ha kudam ki la ing lut.
Haba kylli, u la ïathuh ba ym pat lah ban tip thikna hynrei la shu antad ba ka lah ban dei na ka jingthut ka bording ilektrik.
